"Ich, Jorig der Hawczenperiger(1) vnd mein hawsvraw vnd all vnser eriben, wier vergehen offen war mit dem offen prief, alle de in an sehent oder horent lesen, daz wier mit wolwedachtem muet, rat vnd gunst aller vnser pesten freut [!] gegeben haben vnsern zehent, der gelegen ist in der Chrien(2) auf dem guet, da Vlreich auf gesessen ist vnd gelegen ist in Rorbecher pharr, Mertein(3) dem pharrer czu Rorbach vnd aller seiner nachchumft allso mit der weschayden, daz der egenant pharrer vnd sein nachchumft schol ein ebigen iartag pegen Vlreichen dem Epinger(4) in der ersten vastbochen dez nachcz mit der vigilig vnd smarigens mit vier messen vnd mit vier cherczen. Wier sein auch dez egenanten czehencz sein gewer vnd seiner nach [!] nachchumft an aller der stat, wo in dez not geschat, nach lancz recht vnd waz in dar vmb an gin, daz schul wier im auz richten, daz schol er haben, dacz vnser vnd dacz vnsern trewen. Daz im dy red staet vnd vnczebrochen weleib, geb wier im dem offen brief vnd seiner nachchumft. Ich, egenanter Jorig Hawczenperiger, mein hawsfraw vnd all vnser eriben, versigelt mit meinem anhangunden jnsigl, allez daz staet vnd vnczebrochen cze haben, daz oben an dem brief geschriben stet. Vnd dar czue czu einer pessern sicherhait vnd czegnus mit meines lieben prueder Daenchleins dez Hawczenperiger(5) anhangunden jnsigl, vnd mit Vlreichz dez Lewczenrieder(6), meins lieben swehers anhangunden jnsigl, in paiden vnd iern erben an schaden. Der brief ist geben, da man czalt von Christes gepuerd tausent iar, drew hundert iar, vnd dar nach in dem drew vnd aczchisten iar, an sand Merteins tag."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 199 (S 140), S. 199-200