"Ich, Haeczel(1) der jud, maister Ysrahels(2) suen von Chrems, vnd all mein erben, vergehen offenleich mit dem prief vor allen lawten, dew jn ansehent oder hoernt lesen, vmb den hoff, der da leit ze Wesendorf(3), in dem dorff ze nachst Nyclas dez Sneider(4) lehen, den der erbirdig geystleich herr proebst Hainreich(5) von dem Slegel, chawft hat von Seyfriden dem Gesoler(6), von seiner hawsfraw vnd von ier paider erben, der vnser phant gewesen ist von dem obgenanten Gesoler vnd von seinen erben, sag ich obgenanter Haczschel jud, dem erbirdigen herren, hern Hainreich, probst dacz dem Slegel, dem gotzhaws vnd dem conuent da selbs den obgenanten hoff von mier vnd allen mein erben ledig vnd loz, gantz vnd gar, also, daz wier chainerlay zwspruech noch fordrung schullen noch wellen haben, weder mit recht noch an recht, in chainer weiz an gefaer, wand er ze rechten tagen von vns geledigt vnd gelost ist, vnd dar vmb, so sagen wir jn gancz vnd gar ledig vnd loz, mit vnsern trewen an aydez stat, vnd dez geben wier jm, dem obgenanten hern vnd dem conuent vnd dem gotzhaws datz dem Slegel, ze vrchund der warhait den offen prief, versygelten mit der erbern Hansen dez Polcz(7), dy zeit dez ratz vnd juden richter ze Chrems, vnd Chunratz dez Flanders(8) ze Wesendorf, daz sew paid durich vnsern fleizzigen gepett willen der sach an vnserer stat czewg sind mit iern aygen anhangunden jnsigeln, jn paiden vnd allen iern erben an schaden. Der prjf ist geben nach Christi gepurd drewczehen hundert jar, dar nach in dem acht vnd achtzibisten jar, dez mittichens nach der heyligen dreyer Chvnig tag."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 208 (S 147), S. 210