"In nomine Domini amen. Ad noticiam deducimus christifidelium tam presentibus quam futuris, quod ego Jacobus presbyter de Rosemberg(1) in convencione facta in parte domini Prziechonis(2), plebani ecclesie in Swietlik promitto ac promisi fideliter ratum et gratum tenere in omnibus, quibus me ipsum coram discretis viris et dominis obligavi, videlicet coram dom. Sigismundo(3), plebano ecclesie in Sweraz, et domino Andrea(4), plebano ecclesie in Frinburg, et discreto viro Pessicone de Passowarzow(5), sic quod omnem censum ecclesie et quinque sexagenas annuatim dicto domino Prziechoni plebano solvere teneor, ita quod immediate in festo sancti Georgii proxime venturo solvere teneor VI 1/2 sexagenas et in festo sancti Galli totidem singulis annis tribus, in quibus dictam ecclesiam conveni, computando terminum a festo sancti Galli preteriti ad annos tres, sic quod omnes proventus ecclesie cum agriculturis pro me conveni, excepto quod medietatem devolucionum dicto tempore dom. Prziechoni reddere obligor et eciam jura pro administratoribus exsolvere promitto, nec non dimidium quintum talentum devolucionum cum prescripto censu semper elapsis duabus septimanis sancti Georgii et sancti Galli sine dampnis ipsius dare promisi, peccora et res sive suppellectilia ad plenum et integre post annos tres restituere sive persolvere promisi vel secundum taxam cum parata pecunia in octo sexagenas pro peccudibus me ipsum obligavi. Item quatuor boves, item unus equus, item una juvenca feta, item juvenis bos, item IV scrophe, IV porcelli, galline XXXII, octo olle braseatorie, cerevisia de integro braseo, suppellectilia ista, IX scultelle pociores et IX minores, item unus currus ferratus cum IV rotis et attinenciis, item alius currus pro funo cum attinenciis. Item oreo [!] integra decima cum proventibus de agriculturis ecclesie, ordeum cum vicia, siligo, avena et pisum. Item una pluma et II pulvinaria, urna butiri et una olla. Item V dolia et unum magnum, una cuppa salis, una canula stangnea et alia ferrea, tres mense, due pelves, lauatorium ferreum, due canule parve, sacci X, due flasscones, quelibet de duabus pintis. Item de carnibus bovinis in octo verubus, item tres bipenne et quartum parvum, item duo mensalia et duo manutergia. Hec omnia et singula [......] me accepisse cognosco. Et eciam servicia sive anniversaria cum VI missis et IV pauperibus peragere obligavi, presbyteris vicariis sive rogatis per unum grossum, pauperibus per unum numum contribuendo. Silvas ex integro conservare promisi, architecturas domus usque ad quinque grossos reformando, et si aliqua maiora defecerint, laborantes in expensis meis habere me promisi. Illis autem omnibus cum prescriptis honorabilibus viris et dominis manu indivisa ratum et firmum habere promitto et promisi. In huius rei evidens testimonium sigilla patencia in robur fidei applicare curavi, quousque in actis administratorie potestatis firmius munirentur, anno Domini M. CCCC. VI. feria tercia post Galli."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 241, S. 251-252