"Ad futuram rei memoriam. Excitat mentis nostre arcanum specialis affeccio, qua dilectos filios, abbatem et conventum monasterii Premonstratensis(1), Laudunensis(2) diocesis, sumus hactenus prosecuti et paterno prosequi studio non cessamus, ut circa statum ipsorum necnon dilectorum filiorum abbatum, prelatorum, priorum, prepositorum, decanorum, canonicorum, conversorum, donatorum et dilectarum in Christo filiarum abbatissarum, priorissarum, monialium, conventuum et personarum in humilitatis spiritu in monasteriis sive locis eiusdem ordinis Domino famulancium attente consideracionis intuitum dirigentes eo circa ipsorum quietem fervencius laboramus, ut fecundius illorum religio fructum in eis afferat salutarem et laudabilius possint in Domino proficere incrementis. Hinc est, quod nos nonnullorum Romanorum pontificum, predecessorum nostrorum, vestigiis inherentes predictos abbates, priores, prelatos, prepositos, decanos, canonicos, conversos, donatos, abbatissas, priorissas, moniales et personas cum omnibus membris, curtibus, grangiis, domibus, possessionibus et personis degentibus in eisdem necnon bonis mobilibus et immobilibus ac aliis rebus quibuscunque, que in presenciarum possident et in futurum dante Domino poterunt adipisci legitime, necnon ecclesias et alia loca ab eisdem monasteriis dependencia ab omni superioritate, dominio, iurisdiccione necnon visitacione quorumcunque patriarcharum, archiepiscoporum, episcoporum et aliorum quorumlibet iudicium ordinariorum et officialium ecclesiasticorum plenarie de specialis dono gracie cum moderacione infrascripta eximimus(3) et totaliter liberamus illaque ad ius et proprietatem beati Petri apostoli et sedis apostolice ac sub eorum speciali proteccione suscipientes atque nostra decernimus Premonstratense atque alia monasteria necnon abbates, prelatos [...] prefate sedi soli et immediate subiacere, ita quod patriarche, archiepiscopi, episcopi, iudices ordinarii et officiales predicti racione delicti aut contractus vel rei, de qua agi contingat, ubicunque committatur delictum, ineatur contractus aut res ipsa consistat, non possint auctoritate ordinaria in abbates [...] ecclesias et loca predicta, utpote prorsus exempta, excommunicacionis, suspensionis aut interdicti sentencias promulgare aut potestatem, dominium seu iurisdiccionem aliquam exercere [...]. Volumus autem, quod abbas, qui nunc est, et successores sui abbates, qui erunt pro tempore, dicti monasterii Premonstratensis ac huiusmodi conventus ad indicium percepte a nobis huiusmodi libertatis sex florenos auri de camera in festo beatorum Petri et Pauli apostolorum annis singulis camere apostolice solvere teneantur. Decernimus insuper [...]. Datum Pisis(4), secundo kalendis augusti, pontificatus(5) nostri anno primo."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 250, S. 260-261