"Ich, Goerig der Rueestoerffér(1), mein hawsfraw vnd all vnser erben bekennen mitt dem gegenbuertigen brief allen den er fuer kuembtt, das wir ein genomen haben vnd jnn haben zway vnd dreyssigk pfuntt pfenning Wiennaer muenss, vnd gehoertt das benoentt gelltt zw der alltten chappellen zw Roerbach(2) zw der styfft, dew vnser voerfoederen jn dew benontten chappellen getan habentt, vnd wir sullen auch jaerleich von dem benonten gelltt dienen vnd raichen, die weyll wir das gelltt jnn haben, einem yesleichem pfarrer oder vicary der chirichen zw Roerbach(3) zw vnser frawen tag zw der dienstczeytt czwainczigk schilling Wiennaer pfening. Wuerd jn aber das von vns verczoegen, so scholl vnd mag vns ein yesleicher pharraer oder vicary der chirichen zw Roerbach mitt vnserem guettleichem willen jn den nachsten achtagen nach vnser frawen tag pfenntten auf vnserem gueett zw Freidendorff(4), das gelegen ist jn Roerbekcher pfarr, vmb zehen schilling Wienner pfening, vnd auf vnserem guett czw Rainprechczraewtt(5), gelegen ist jn Peylstainer(6) pfarr, auch vmb zehen schilling Wiennaer pfening, vnd sind die benonten guetter paidew gelegen jn Velldnaer lanntgerichtt. Vnd wir muegen noch sullen wider dew pfannttung nichcz reden noch tuen, mitt rechtt noch an rechtt, geystleich noch wellttleich. Ich vorgenonnter Rueestoerffer vnd all mein erben sullen noch muegen die benontten guettér nicht verseczen noch verchawffen, die weyll wir die zway vnd dreyssigk pfuntt pfening jnn haben. Wollt wir es aber verseczzen oder verchawffen, so sullen wir das gelltt vnd den dienst einem yesleichen pfarrer oder vicary ee des machen auf andern vnseren gueettern jn dem lanntt, vnd die selbigen gueetter dann auch verpriefen nach des gegenbuertigen brieffs ausbeysung, oder aber die benonten zway vnd dreyssigk pfuntt Wiennaer pfening vor beczallen dem benonten pfarraer. Waer, das der arrtikkel, die oben verschriben sind, ainer oder meniger von vns vebergriffen wuerd, das ein pfarrer oder vicary zw Roerbach zw schaeden chaem, den jr ains oder jr gebiser scheinpott mit slechtten wartten gesprechen moechtt an aid vnd vngeswoeren vnd an alls rechtt, die selbigen schaeden zw sambtt dem hawbtguett sullen sew haben, dacz vns vnd vnseren trewen vnd auf aller vnser hab vnd besunderleych auf den vorgenonten vnseren guettern zw Fridendoerff vnd zw Rainprechczraewtt, der muegen sy sich woll vnderwinden, alls lanng vnd alls vill, das sy hawbtguettz vnd schaeden bechoment nach irer fuegsamchaitt, vnd was wir dawider retten oder taetten, mitt rechtt oder an rechtt, geystleich oder welltlaich, das habentt sew an aller statt gebuengen vnd behabtt, vnd wir gaennczleich verloren. Auch ist zw merkchen, das ein yegleicher pfarrer oder vicary soll haben vnd ausrichtten all wochen an dem manttag jn der genonten chappellen ain mess vnd allew jar jaerleich ein jartag mit achtt messen auf vnser frawen tag zw der liechtmess jn den acht tagen vor oder nach herren Rueegeren auf dem Perig(7) vnd seiner hawsfrawen, nach aus weysung des stifftbrieffs(8), den der pfarrer jnn hatt. Taett aber des ein pffarrer oder ein vicary nichtt, alls offt des ier ainer vberbeyst wuerd, so ist er albeg verfallen zw ainer pen dem erbirdigen geystleichen herren, dem probst dacz dem Slegl(9) ain pfuntt Wiennaer phening. Auch hab ich, vorgenontter Rueestoerffer vnd mein erben von einem yesleichen pfarrer zw loesen zw vnser frawen tag zw der liechtmess vierczehen tag vor oder nach vmb die vorgenonten zway vnd dreyssigk pfuntt pfening, vnd wann wir dann geloest haben, so soll das gelltt mit des pfarrers willen nider gelegtt werden alls lanng, das es nach der nachsten frewnt ratt vnd nach ander erberger laewtt weysung vnd mit eins pfarrers willen werd wider angelegtt, damit der pfarrer seins zins jaerleich bechomen mag vnd dew benonten zway vnd dreyssigk pfuntt pfening vnuertaendleich beleiben. Der sach czw einer waren vrkuend, so gib jch vorgenonnter Joerig Rueestoerffer fuer mich vnd fuer all mein erben einem jesleichen pfarrer oder vicary zw Roerbach, der yeczund ist oder noch kuenftig wiertt, den brieff besigllten mit meinem aigen anhanngundem jnsigll, vnd darczue hab jch [mit] vlleizz gepetten den edlen weysen Hartlieben den Herleinsperiger(10), die zeitt pfleger zw Valkhen Stain, vnd den erbern weysen Veedueng den Liechtten Ekker(11), die czeitt lanntrichter czw Vellden, das die jerew jnsigl zw zewgnuess, vnd durich meiner fleissigen pett willen auch an den brief gehanngen habentt, doch jn paiden vnd allen jeren erben an schaden, darunder jch mich verpintt mit mein trewen fuer mich vnd fuer all mein erben, alles das trewleich war vnd staett zw haben, das der gegenbuertig prief ausweyst. Der prief ist geben an der heyligen dreir chuenig abentt, alls man czallt von Christy gepuerd vierczehen hundertt jar, vnd dar nach jnn dem fuemf vnd zwainczkisten jar."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 283 (S 187), S. 303-305