"Petrus Fride(1), canonicus ecclesie necnon officialis curie Patauiensis in spiritualibus generalis et in hac parte commissarius et reuerendissimo in Christo patre et domino nostro, domino Leonardo(2), episcopo Patauiensi, ad infrascripta specialiter deputatus, vniuersis et singulis ecclesiarum parochialium rectoribus aut eorum locatensium, socijs diuinorum presbyteris, curatis et non curatis, necnon tabellionibus et notarijs publicis pro ciuitatem et diocesim Patauiensem vbilibet constitutis, salutem in Domino. Pro parte venerabilium ac religiosorum virorum dominorum prepositi, fratrum et conuentus monasterij in Plaga(3), Patauiensis diocesis, fuit nobis querulanter expositum, quod quamuis a tanto tempore, cuius contrarij horum memoria non existit, parochialis ecclesia in Rorbach, eiusdem diocesis, ipsis fuisset dudum tam auctoritate apostolica quam ordinaria annexa et incorporata, jnstitutaque ibi vicarijs perpetuo ac eiusdem temporibus ipse vicarius pro tempore existens consueuerit monasterio prefato singulis annis certam soluere annuam pensionem, videlicet sedecim libris denarijs Vienensium. Quodque eciam quidam Volfgangus de Perg(4), vicarius eiusdem ecclesie, cui ipse prepositus et conuentus eandem vicariam contulerunt siue ad eandem presentauerunt, ut de premissis non ignarus in principio sui introitus premissa confirmans seque ad huiusmodi pensionis solucionem personaliter obligans et per plures annos soluens, demum jam quatuor annis proxime elapsis, nescitur quo spiritu ductus, ipsam pensionem soluere neglexit, ymo penitus recusauit et recusat de presenti in anime sue periculum, ipsiusque monasterij et cultus diuini, quod in alijs propter vicinitatem hereticorum(5) diminutum est, non modicam diminucionem et nisi sibi de iusticia et alijs pijs operibus succurrant, ipsum monasterium timetur venire ad irecuperabilem ruinam. Qua propter nobis idem reuerendissimus in Christo pater, dominus noster, dominus Leonardus, episcopus prefatus, tam viueuoco oraculo, quam eciam pro relacioni venerabilis viri, domini Petri(6) prepositi ecclesie collegiate sancti Johannis in Vilshouen, eiusdem dyocesis, nobis commisit et mandauit, ut eiusdem preposito et fratribus et conuentui per litteras nostras monitoriales conuentorem Volfgangum vicarium prefatum super premissis firmariam ac celerem iusticiam attentis premissis administramus. Nos jgitur attentis premissis volentes litium amfractus dirimere, in quantum possumus, propter ipsius monasterij paupertatem ac eciam mandatis dicti domini nostri episcopi obedire, ut tenemur, visis primitus autenticis litteris et priuilegijs eiusdem monasterij et obligacionem predictam, vobis omnibus et singulis et vestrum cuilibet in virtute sancte obediencie ac sub excommunicacionis pena, quam in vos et vestrum quibuslibet ferimus in hijs scriptis districte precipiendo mandamus, quatenus infra trium dierum spacium, postque propter prepositi et conuentus predictorum fueritis requisiti aut alter vestrum fuerit requisitus, prefatum Volfgangum vicarium auctoritate nostra moneat et requirat, quem et nos tenore presencium sic requirimus et monemus, quatenus sub eadem excommunicacionis pena, quam in eundem similiter ferimus in scriptis, si non fecerit quod mandamus infra quindecim dierum spacium, atque executionem primitus [?] conputandam, quorum quindecim dierum quisquis pro prima, quisquis pro secundo, et reliquos quinque dies pro tercio et peremptorio termino ac canonica monicione premissa assignamus, prelibatis preposito et conuentui soluant et realiter tradat omnes census et redditus, jam per aliquos annos proxime elapsos perennj neglectos siue soluere recusatos. Ac deinceps similiter singulis annis dictum censum soluere nullatenus negligat, contradicat siue recuset, sed potius realiter et cum effectu persoluat, vel infra dan[...](7) decim dierum terminum se cum eiusdem preposito et conuentui pacifice et amicabiliter compareat, aut interea censum [...]lem, siquam habeat, quare ad premissa minime curat[...] allegat. Alioquin dicto termino elapso prima die juris [...] proxima tunc inmediate sequente, qua nos in curia nostre habitacionis pro tribunali sedere contigit, conpereat ad dicendam et alligandam causam, quare in easdem sententias excommunicacionis incidisse declarari ut debeat. Nos enim, siue conparuerit siue non, ad ulteriora in causa huiusmodi procedemus iusticia mediante de execucione vero presencium nos per litteras Patauientes aut alia legitima documenta certificata curetur pena sub predicta. Datum Patauie, die XXIIa julij, anno etc. XXXo, sub inpressione nostri magni sigilli etc."||
||
[Nachschrift unten rechts:] "Venerabilis pater et domine. Ego Stephanus(8) de Altenvelden executus sum presens madatum jn festo Jacobi apostoli, presentibus ibidem domino Jacobo(9) capellano in Sprinczenstain et domino Eustachio(10) vicario jn Serlainspach, et quam pluribus presentibus(4) laicis et huius rei in testimonium signetum [?] meum impressi."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 289.a, S. 308-311