"Petrus Fryde(1), canonicus ecclesie necnon officialis curie Patauiensis in spiritualibus generalis, et in hac parte commissarius a reuerendissimo in Christo patre et domino nostro, domino Leonardo(2), episcopo Patauiensi, ad infrascripta specialiter deputatus, vniuersis et singulis ecclesiarum parochialium rectoribus aut eorum locatenentibus, socijs diuinorum presbyteris, curatis et non curatis, necnon tabellionibus et notarijs publicis, ciuitatem et diocesim Patauiensem vbilibet constitutis, salutem in Domino. Dudum per nostras patentes litteras monitoriales Wolfgangum de Perg(4), vicarium perpetuum ecclesie parochialis in Rorbach, monimus et requisimus moneri et requiri mandamus, quatenus sub excommunicationis pena, quam in eum tunc in precepto tulimus, ut infra certum terminum tunc expressum, venerabilibus ac religiosis viris, preposito et conuentui monasterij in Plaga(3), Patauiensis diocesis, soluitur et realiter tradetur omnis census et redditus iam per aliquos annos proxime elapsos per eum neglectos siue soluere recusatos, quos secundum antiqua priuilegia et alias de iure eisdem racionabiliter dicte sue ecclesie soluere tenebatur, prout tenere ac deinceps singulis annis eundem censum soluendum ullatenus negligetur neque soluere contradicetur aut recusaret, sed potius realiter et in effectu persoluetur aut infra dictum terminum se cum eisdem preposito et conuentu amicabiliter componetur uel interim causam racionabilem, siquam haberet, quare ad premissa minime tenetur, allegaret, alioquin ipso termino elapso prima die juridica, proxima post dictum terminum futura coram nobis comperet ad dicendam et allegandam causam, quare in ipsas sentencias excommunicationis incidisse declarari non debetur, prout in dictis nostris litteris monitorialibus plenius continetur. Et quamuis dictis litteris nostris debite executis, ipsoque Wolfgango debite requisito atque mearum ipsarum litterarum tenore monito, ipse tamen nostra mandata proinpediens, eisdem litteris nostris atque mandatis minime parere ac dictum censum persoluere minime curauit. Quapropter eundem prefatas excommunicacionis sententias, prout debuimus, ad ipsorum dominorum prepositi et conuentus instanciam incidisse declarauimus ac tenore presencium declaramus. Quapropter vobis omnibus et singulis supradictis, qui tenorem presentium fuerint requisiti seu alter vestrum fuerit requisitus, in virtute sancte obediencie ac sub excommunicationis pena districte precepiendo mandamus, quatenus eundem Wolfgangum singulis diebus dominicis in ecclesiis ac ambonibus vestris tamquam excommunicatum publice nuncietis, et ab alijs denunciari faciatis, et nichilominus ab omnibus christifidelibus arcens euitarj, donec et quousque aliud a nobis habueritis mandatum. De execucionibus vestris presentis nostris litteris certificare tenetur. Datum Patauie, die XVIIa augusti, anno etc. XXXo, sub jmpressione nostri sigillj."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 289.b, S. 308-311