"Johannes(1), miseracione diuina sancti Angeli sacrosancte Romane ecclesie diaconus cardinalis, sancte sedis apostolice in Germanie et nonnullis aliis partibus legatus de latere specialiter deputatus. Vniuersis et singulis christifidelibus presentes litteras inspecturis, salutem in Domino sempiternam. Splendor paterne glorie, qui sua mundum illuminat jneffabili claritate, pia vota fidelium de ipsius clementissima maiestate sperancium tunc precipue benigno fauore proseqitur, cum deuota ipsorum humilitas sanctorum precibus et meritis adiuuatur. Cupientes igitur, vt monasterium beate Marie virginis assumptionis in Slag(2), Patauiensis diocesis, et capella Saluatoris et annunciacionis beate Marie virginis ante portam(3) dicti monasterij congruis frequententur honoribus, fidelesque ipsi eo libencius deuocionis causa confluant ad easdem, quo ibidem dono celestis gracie vberius conspexerint se refectos, a Christi quoque fidelibus iugiter veneretur, de omnipotentis Dei misericordia ac beatorum Petri et Pauli apostolorum, eius auctoritate confisi, omnibus vere penitentibus et confessis, qui dictas monasterium et capellam in natiuitatis, circumcisionis, epyphanie, resurrectionis, ascensionis et corporis Domini nostri Ihesu Christi, ac penthecostes, necnon in natiuitatis, annunciacionis, visitacionis, purificacionis et assumpcionis beate Marie virginis, ac natiuitatis beati Johannis baptiste, dictorum Petri et Pauli apostolorum, aliorumque patronorum ipsorum monasterij et capelle, ac dedicacioni eorundem festiuitatibus et omnium sanctorum celebritate deuote visitauerint annuatim, et ad reparacionem, conseruacionem et augmentacionem calicum, librorum, vestimentorum et aliorum ornamentorum pro diuino cultu inibi celebrando necessariorum, quocienscunque manus porrexerint adiutrices, centum dies indulgenciarum de jniunctis eis penitenciis pro qualibet ipsarum festiuitatum et celebritatis misericorditer in Domino relaxamus, presentibus vero perpetuis futuris temporibus duraturis. Jn quorum fidem et testimonium premissorum presentes litteras exinde fieri et per secretarium nostrum subscribi nostrique sigilli oblongi iussimus et fecimus appensione conmuniri. Datum Wienne(4), Patauiensis diocesis, sub anno a natiuitate Domini millesimo quadringentesimo quadragesimo octauo, jndictione vndecima, die vero tercia mensis junij, pontificatus sanctissimi in Christo patris et domini nostri, domini Nicolai(5), diuina prouidencia pape quinti, anno secundo."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 319 (S 211), S. 345-346