Wir Pernhart(1), graue ze Schawnberg, lanndmarschalch jn Oesterreich. Bekennen mit dem brief fur vns den hochwirdigen vnd die wolgeborn graf Albrechtn(2), brobst Allerheiligen tumbkirchen ze sannd Stephan ze Wienn, graf Vlreichen(3), graf Sigmunden(4) vnd graf Wolfganngen(5), auch grauen ze Schawnberg, vnser lieb brueder vnd all vnser erben, das fur vns kame der erwirdig geistleich vnd vnser besunderlieb . . der brobst vnd der conuent des gotshaws zu dem Slegel(6), vnd brachten vns fur ettlich hanntfest vnd brief von vnsern voruodern, vnd besunder von wielennd vnserm lieben herrn vnd vater graf Johannsen(7), grauen ze Schawnberg loblicher gedechtnuss ausganngen, die da sagten vber solich gnad vnd freihait, die sew an vnserr mawt ze Asschach(8) vorher gehabt vnd bis an vns redleich herbracht haben. Jn der maynung, das sew vnd all jr nachkomen alle jar jerleich von wein vnd getraid, so man jn herauff zu jrem gotshaws furt, von ygleicher scheffart fur recht vnd mawt vnd alle sach zwelf phening geben sullen vnd nicht mer. Baten sew vns diemutickleich vnd mit vleiss, jn vnd jren nachkomen dieselben jr hanntfest, brief vnd all des herkomen gnedigklich zu uernewen vnd zu bestaettigen. Wann wir nu gotsgab vnd guete werch, die vnser vodern, den Got gnedig sey, gegeben haben, vnd die bis an vns gehanndelt sind, nicht abnemen noch ringern wellen, sunder wol genaiget sein, die ze allen zeiten zu mern vnd zu pessern, haben wir jn dadurch vnd voran vmb lones willen gotlicher widerkerung zu hail vnser vnd aller vnserr vodern sele solch jr hanntfest, brief vnd freihait, als oben gemelt sind, bestaet vnd confirmirt, vnd bestatten jn auch die wissenlich mit dem brief, was wir jn doran bestaetten suellen vnd muegen. Wir haben jn auch yczt von newem die sunder gnad getan wissenlich mit dem brief, was jn jerleich floess, lare vas, oder annder holczwerch zu jren weingarten vnd jren notdurfften nawgefurt wirdet, das jr ist vnd jr protpot bey sein trewen gesprechen mag, das sew vns dauon kainerlay mawt nicht geben noch ze geben phlichtig sein sullen vngeuerleich. Vnd vmb die obgemelt gnad vnd freyung, die wir dem benannten gotshaws bestet vnd yczt von newem getan vnd gegeben haben, sullen sy vns alle jar jerleich jn gueter andacht vnd mit grossem vleiss jn jrem gotshaws ain jartag(9) begeen des nagsten montag abents nach mittervasten mit ainer gesungen vigili vnd dornach des morgens mit ainem gesungen selambt vnd darunder mit vir gesprochen selmessen, vns snd vnsern vodern vnd nachkomen ze hilff vnd ze trost, vnd vnser aller sele hail willen, jn aller mass vnd gedêchtnuss, als wir vnser leipliche begrebnuess jn jrem gotshaws hieten. Waer aber, das sy den egenannten jartag alle jar jêrleich jn obgeschribner maynung nicht volfurten, welhes iars sew des redlich vberfarn vnd vnderweiset wurden, so ist die gnad vnd alle freyung gennczlich ab vnd steet an vnsern gnaden, ob wir jn die furbaser geen lassen oder nicht. Mit vrkund des briefs, besigelten mit vnserr obgenannten graf Pernharts, grauen ze Schawnberg anhangunden jnsigel. Der geben ist ze Euerding, an freitag vor sannd Kathrein tag, nach Cristi gepurde virczehen hundert jar, vnd dornach jn dem sechsundfunfczigisten jare."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 358 (S 243), S. 386-387