"Ich Hanns Staerlinger(1) richter zu Haslach bechenn fur mich vnd all mein eriben vnd twe kund mit dem offen brief alln den er furkumbt, das jch ganczen zehent am Chobl(2) vnd an der Muel(3) dabey gelegen ze nachst bey Sprincznstain jn Rorbekcher pharr vnd Veldner lanndtgericht, der zu lehen ruert von dem edeln vnd vessten Rugern abm Perg(4), recht vnd redlich verkaufft vnd ze kauffen gebn hab meinem lieben swager Lienhartten Sneider(5) richter zu Rorbach, seiner hausfrawn vnd jr baider eriben vmb ain sumb gellts, der jch gancz vnd an schaden entricht vnd beczallt pin, vnd dauon so hab jch den vorgemelten zehent, aller zuegehorung, dem benanten meinem swager seiner hausfraw vnd jr baider eriben jngeanntwurt vnd vbergeben aus mein vnd meiner eriben nucz vnd gwer jn jr nucz vnd gwer, damit si nu furan alln jrn frumen mugen schikchen, nuczen, niessen, verseczen, verkauffen, geben, schaffen, machen, wem si wellent, damit hanndln vnd tuen, wie sew verlusst an mein, meiner eriben vnd mênigklichs von vnsern wegen jrrung vnd widersprechen. Jch vnd mein eriben sein auch des vorgemelten zehents zu kauff jr recht gwern vnd furstandt, als solichs kauffs, lehens vnd lanndes ob der Enns recht ist. Gieng jn aber an der gwerschaft mit recht jcht ab, des si zu schaden komen, den selben abgangk zu sambt dem schaden geloben wir jn gancz abzelegen vnd widerzekern, vnd si sulln auch das alles haben vnd bekomen zu mir, mein eriben, vnd darzue auf allem vnserm gut, vngeuerlichen. Des zu vrkund gib jch jn den brief, besigelten mit mein obgenants Hannsen Starlinger anhangunden jnsigl, vnd zu pesserer sicherhait besigeltn mit des vorgenanten lehnherren Ruegern abm Perg anhangunden jnsigel, der das durch meiner vleissigen pet willen daran gehenget hat, jm vnd sein eriben an schaden, auch vnbegriffenlich an jrr lehnschafft. Der brief ist geben an montag nach Jnuocauit jn der vassten, nach Kristi gepurd jm vierzehn hundertisten vnd achtt vnd funfczigisten jare."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 363 (S 247), S. 391-392