"Wir Andree(1) brobst zu vnser frawn Slag, Achacz(2) prior vnd gemainkleich der gancze conuent doselbs. Wekennen fuer vns vnd all vnser nachkomen vnd thun kund mit dem offen brief allermaenikleich das wir die vbermass vber dew fuenffczig phunt phenning, so Kristan Stegmuellner(3) saeliger zu ainem ewigen jartag auf der Stegmuell zu vnser frawn kirchen aufm Anger geschafft hat, vmb vierunddrewssig phunt phenning von den nagsten erben vnd frewndten keufleich kauft vnd abgelost haben. Dieselben vierunddreussig phunt phenning vnser lieber mitpruder(4) Andre Staynasperger(5) vnd Elspet sein hausfraw von vns kauft vnd widerumb zu der wenanten kirchen aufm Anger zu ainem ewigen jartag geschaft, gestifft vnd geaygent haben. Darumb wir jnn vnd iren voruoderen ainst ym jar wegeen schullen vnd wellen jn der wenanten vnser frawn kirchen aufm Anger vngeuerleichen an mitichen nach der heiligen auffart vnsers lieben herrn des abents mit ainer gesungen vigily, des morgens mit ainem gesungen seleambt vnd zwain gesprochen messen, mit liechten, gelewten, so dann dartzue gehort. Auch das wir vnd vnser nachkomen all dulceit vnd wann der jartag gehalten wirt, auf der kchanczel(6) vmb jr vnd irer voruoderen sele vnd vmb all dew aus irem geslacht verschaiden sein, pitten schullen. Darauf geloben wir fuer vns vnd all vnser nachkomen mit vnseren trewn jn kraft des brieffs, den obgenanten jartag jn obuerschribner mass ze halten vnd volbringen. Geschaech aber des nicht, das wir den obgestimbten jartag jn acht oder vierczehen tagen aufs lengist nicht ausrichttaeten vnd volbraechten, wann wir oder vnser nachkomen des warleich vbergriffen wurden, dann so hat vns der obgenant Andre, sein hausfraw, jr erben oder wer vns mit dem brief ermant, mit hilff ains vogts, der dann dieselb zeit vnsers goczhaws vogt ist, die nuecz auf der wenanten muell, so vill die nucz vmb die obgenanten vierunddrewssig phunt phenning bringen, nidertzelegen als lang, vnczt solher jartag vnd goczdienst gar vnd gancz ausgericht, erstat vnd gehalden ist worden. Wann dann der wenant jartag vnd goczdienst gancz erstat vnd volbracht ist worden, so dann schullen die nidergelegten nuecz auf der wenanten muell vmb die vierunddreussig phunt phenning dem wenanten goczhaws vnser frawn Slag wider ledig sein an menikleichs hindernuss, jrrung vnd widersprechen. Daruber zu ainer waren vrkundt geben wir den brief, mit vnseren obgenanten Andree, brobst zu vnser frawn Slag vnd des conuents doselbs aygen anhangunden jnsigeln. Darunder wir vns fuer vns vnd all vnser nachkomen verpindten mit vnseren trewn, alles war vnd staet ze halten, so oben an dem brief geschriben stet. Der geben ist nach Cristi geburdt vierczehen hundert, darnach jn dem newnundfunffczigisten jare, an mantag nach sand Jacobstag des heiligen tzwelifpoten."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 375 (S 258), S. 407-408