"Wir Fridreich(1) von Gots gnaden Roemischer kayser zu allenn czeiten mêrer des reichs, zu Hunngern, Dalmacien, Croacien etc. kuenig, herczog zu Oesterreich, zu Steir, zu Kernnden vnd ze Krain etc. Bekennen vnd tun kund offenntlich mit dem brief, daz fur vnns komen ist der ersam geistlich, vnnser lieber andêchtiger Anndree(2), brobst vnnser lieben frawen gotshaws zum Slegel, in vnserm fuerstentumb Oesterreich in dem Muehellannd gelegen, vnd bat vnns diemueticleich, daz wir solh freyhait, gab, gnad vnd recht, so er vnd sein goczhaws an vnnsern mauttsteten mit jren vnd jrs gotshaws speis vnd notdurft ze fuern, vnd die gerichtt, jarmarkcht vnd wochenmarkcht, so sy in jrem markcht zum Aigen(3) habent, vnd in jren briefen vnd hanntuessten von vnnsern vordern fuersten von Oesterreich seliger gedêchtnuss ausgeganngen vnd in anndern jren fuerstlichen briefen begriffen sein, jm vnd seinn conuenntbruedern mitsambt jrer gerechtikait an der mautt zu Sawraw(4) zu bestêtten gnedicleich geruechtten. Vnd wan wir die werich, die Got zugehoren, pilleich mer dann zeitliche ding fuerdern vnd den geistlichen personen vnnser gnad mittaillen sullen, damit sy dem gotsdiennst desterpas aufwartten muegen, haben wir angesehen des egenannten brobst gebete, vnd daz wir sein vnd seiner brueder guten werich in dem ewigen leben tailhefftig werden, vnd haben jm vnd seinen conuenntbruedern die vorgeschriben jr freyhait, gab, gnad vnd recht an vnnsern mauttsteten, auch in jrem markcht zum Aigen vnd an der mautt zu Sawraw, als die oben begriffen seinn, vnd sy die von allter herbracht habent von Roemischer kayserlicher macht vnd als erblicher regierunder herr vnd lanndesfuerst in Oesterreich gnedicleich vernewet vnd bestett, vernewen vnd bestetten jn die auch mit rechtter wissen in kraft des briefs, maynen, seczen vnd wellen, daz sy vnd jr nachkomen die nu ennthin in kunftigen zeiten nuczen, nyessen vnd gebrauchen sullen vnd mugen vor menicleich vngehynndert. Dauon gebieten wir den edeln vnd vnnsern lieben getrewn .. allen vnnsern haubtlewten, grauen, herren, rittern vnd knechtten, phlegern, burggrauen, burgermaistern, richttern, mauttern, ambtlewten vnd allen anndern vnnsern vnndertanen, gegenwurtigen vnd kunftigen ernnstleich vnd wellen, daz sy die vorgenannten brobst, conuennt vnd jr nachkomen bey den vorgeschriben jren freyhaiten, gaben, gnaden, recht, gerichtten, jarmarkcht, wochenmarkcht vnd mautt gennczleich beleiben vnd die strassen von Wulta(5) vber wald gen Behem herwider, vnd weiter aus in das lannd mit hohen vnd nidern wêgen an die obgenannt jr mautt farn, jr gut da vermawtten lassen, als von allter ist herkomen, an alle jrrung vnd hindernuss vngeuerleich. Mit vrkund des briefs, geben zu Wienn, an eritag vor sannd Kolmans tag, nach Kristi gepurd vierczehen hunndert, vnd darnach in dem newnundfunfczigisten jare, vnnsers kaysertumbs im achtten, vnnserr reich des Roemischen im zwainczigisten vnd des Hunngrischen im ersten jaren." ||
Unter der Plica: "Commissio domini jmperatoris propria"

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 376 (S 259), S. 408-409