"Ich Wolfgang Pergêr(1) abm Perig dieczeyt kirichhêrr vnd pfarrêr zu Rorbach. Bekenn offenlich mit dem brief fuer mich, all mein nachkomen pfarrêr vnd vicary daselbs, wer die chuenftigklich sein oder werdent, vnd tun chunnd allen den er fuerkumbt, als mir die edelen, vessten Dannkchwart(2) vnd Vlreich(3), gebrueder die Herleinsperger, stifft vnd kappelln des heyligen ritter sannd Jorigen, gelegen jn der bemelten pfarrchirichen daselbs zu Rorbach, alcz jrem chaplan verlihen habent(4). Dieselben kappelln mit irer czugehoerung jch obgenanter Wolfgang Pergêr abm Perig mit willen der obgenanten meiner herren der Herleinsperger, auch nach rat, aus meiner gewaltsam vnd hennden uebergegeben vnd eingeantwurtt hab dem ersamen wirdigen herren Hannsen Glennsen(5), die czeit vicary daselbs, also vnd in solicher beschayden, das allew verschreybung, so vormalln von der gemellten stifft vnd kappelln wegen von mir oder meinen vorherren chirichherren vnd pfarrern der obgemelten pfarrchirchen zu Rorbach sein ausgangen, ganncz bey chrefften ||
beleyben vnd gehallten suellen werden nach jnnhalt irer lawtt, puennd vnd artikl, darumb mir vnd meinen vorherren, auch der gemelten pfarrkirichen Rorbach genugsamlich widerlegung beschehen ist. Jch glob auch in krafft des briefs fuer mich, all mein nachkomen pfarrer vnd vicary der bemelten pfarrchirichen zu Rorbach, das wir alles das darumb dann verschreybung vormalln ausgangen sind, ausrichten sullen vnd wellen pey den pen, so dann voran in verschreybung darumb sind benent. Vnd was wir pfarrer oder vicary oder yemant annders wider das alles anerhueben oder chriegten, es waer mit geystlichem oder werltlichem rechten, das haben wir vnrecht vnd verlorn, vnd sy behabt recht vnd gewunnen, wo das fuer kaeme. Des zw vrkunnd gib ich obgenanter Wolfgang Pergêr abm Perig den brief, besigelt mit meinem aygen anhangunden jnsigel vnd zu geczêwgnuesse hab ich gepeten den edeln Jorigen Raspen(6), das der sein jnsigel auch an den brief gehanngen hat, jm vnd sein erben an schaden. Darunnder jch mich obgenanter Wolfgang Pergêr abm Perig mit meinen trewen verpinndt fuer mich vnd fuer all mein nachkoemen pfarrer vnd vicary der obgemelten pfarrchirichen zu Rorbach, alles das war vnd staet ze hallten, das der brief ausweyst. Der gebet vmb das jnsigel sind zewgen der ersam geistlich herr Lienhardt Waczenkiricher(7) die czeyt pfarrer zw Alltenfelden, vnd die edeln Hanns Herleinsperger(8) vnd Klaus Stetlinger(9). Der brief ist geben an pfincztag vor sanndt Pawls tag der becherung, als man czallt nach Chrissty geburde tawsent vierhunndert vnd jn dem sechczigissten jare."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 382 (S 266), S. 415-416