"Philippus(1) miseratione diuina tituli sancti Laurentij in Lucina presbyter cardinalis, dilecto in Christo fratri Andree(2), preposito monasterij beate Marie ad Plagam, ordinis Premonstratensis, per prepositum soliti gubernari, Patauiensis diocesis, salutem in Domino. Solet annuere sedes apostolica pijs votis et honestis petentium precibus maxime, vbi salus requiritur animarum, fauorem beniuolum impartirj. Cum igitur ex parte tua nobis fuerit humiliter supplicatum, vt in anime tue solatium eligendi confessorem(3) ydoneum tibi licentiam concedere dignaremur. Nos tuis supplicationibus fauorabiliter annuentes, auctoritate domini pape, cuius penitentiarie curam gerimus, et de eius speciali mandato super hoc viue vocis oraculo nobis facto deuotionj tue concedimus, quatenus liceat tibi ydoneum et discretum presbyterum in confessorem eligere, qui super peccatis, que sibi confiteberis, nisi talia sint propter que merito sit sedes consulenda predicta, tibi eadem auctoritate prouideat de absolutionis debite beneficio et penitentia salutari, quamdiu vixeris, quotiens fuerit oportunum, vota uero peregrinationis et abstinentie, si qua emisisti, que commode seruare non potes, vltra marino beatorum Petri et Pauli atque Jacobi apostolorum votis dumtaxat exceptis, commutet tibi idem confessor in alia opera pietatis. Datum Rome, apud sanctum Petrum, sub sigillo officij penitentiarie, XIII kalendis aprilis, pontificatus domini Pij(4), pape II, anno quarto."||
Auf der Plica: Jo. de Forano. Unter der Plica: D. Brunna sextus (?) / B. de brunno (burnio) (?)

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 390 (S 272), S. 424-425