"Ich Casper Herleinsperger(1), die zeit pfleger zw Orth: Bekhenn offentlich mit dem brieff für mich, all mein erben, vnd thue khundt allen, den er fürkhumbt, sehent, hörendt oder lesendt, das jch mit guetem willen recht vnd redlich verkhaufft vnd zw khauffen geben hab, vnd gib auch wissentlich in crafft des brieffs dem edlen vessten Vlrichen Herleinsperger(2) zw Tanberg, meinem lieben vettern vnd seinen erben die hernach verschriben stuckh: Jtem auf 14 stuckhen ackhern vnd wismadt zw Griespach(3) auf dem hohen markht die mannschafft. Jtem ein holz vnd ein wismadt, genant die Zell(4), das jetzt die Scherßneder(5) daselbs jnhabent. Das ehegenant alles ist lehen von dem hochwirdigen bistumb zw Passaw, vnd gelegen in Griespeckher(6) pfarr, in dem lanndtgericht auf St: Georgenperg(7) ob Passaw. Die obgenanten stuckh, voggthabern, mannschafft, lehenschafft, all mein gerechtigkhait, so jch daran gehabt, genüzt vnd genossen hab, nichts darin ausgezogen noch hindan gesezt, vngefehrlich. Alls jch vnd meine vorfordern das bisher jngehabt vnd herbracht haben, hab jch jm zw khauffen geben vmb ein summa gellts, der jch gannz ausgericht vnd bezallt worden bin nach meinem benüegen. Darauf hab jch jm die obgenanten mannschafft, lehenschafft vnd vogthabern übergeben vnd eingeantwortt, aus mein vnd meiner erben gwallt, nuz vnd gwehr in die jhren, also vnd in solcher mainung, das nun hinfüro der bemellt mein vetter Vlrich Herleinsperger vnd sein erben mit den obgenanten stuckhen, aller zuegehörung, jren nuz vnd frumben betrachten sollen vnd mügen mit einnemben, verleihen, verkhauffen vnd geben, wem sie wellent, ohn mein obgenants Caspar Herleinsperger, meiner erben, auch ohn menigclichs von vnnsernt wegen jrrung vnd einsprechen, gwehrschafft, ut in forma communi. ~ Zw vhrkhundt gib ich obgenannter Caspar Herleinsperger den brieff, besiglten mit meinem aignen anhangendten jnsigl, vnd zw gezeugnus hab jch gebetten den edlen Georgen Staspan(8), meinen lieben schwager, das der sein jnsigl darzw gehangen hat, jm vnd sein erben ohn schaden. Geben, alls man zelt nach Christi gebuerth 1464, am montag vor St. Matheus tag, des heilligen zwelff potten."||
||
[Postscripta:] ||
1) "Collat: gegen dem original, vnd erfindt sich gleiches jnhallts. Actum Lynnz, den 21. marty, anno 1629. Leonhard Khapfer von Khapfenstein, lanndtschreiber."||
||
2) "Collat: gegen einer vidimierten abschrifft vnd erfindt sich gleiches jnhallts. Actum Lynnz, den 19. juny 1629. Leonhard Khapfer von Khapfenstain, lanndtschreiber."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 698, S. 759-760