"Wir, Vlrich(1), von Gottes genaden bischoue zw Passaw, bekhennen, das vnns vnnser lieber gethreuer Hanns Herleinsperger(2) an seinem offen versiglten brieff das guett zu Hungernperg(3) in Veldner pfarr vnd lanndtgericht gelegen, vnnser vnd vnnsers stiffts lehenschafft aufgesandt vnd diemüetigclich gebetten hat, das vnnserm lieben, gethreuen, Vlrichen Herleinsperger(4), seinem vettern, zuuerleihen, wann er jm das zw khauffen geben hiet. Das haben wir gethan vnd demselben Vlrichen das benandt guett mit seiner zuegehörung verlihen, vnd leihen auch wissentlich mit dem brieff, was wir jm zw recht daran verleihen sollen oder mügen, also, das er vnd seine erben das nun fürbas von vnns vnd vnnserm stifft in lehens weis jnhaben, nüzen vnd nüessen sollen vnd mügen, alls lehens, lanndts vnd vnnsers stiffts recht ist, doch vnns vnd demselben vnnserm stifft vnuergriffen an der lehenschafft, vngefehrlich. Mit vhrkhundt des brieffs, geben zw Passaw, am pfingstag nach dem heiligen weinacht tag, nach Christi gebuertt 1463. jahr."||
||
[Postskript:] "Collationirt gegen thaills original vnd thaills vidimirten abschrifften, vnd erfindten sich dise denselben gleichlauttundt. Actum Lynnz den 19. Juny. anno 1629. Leonhard Khapfer von Kapfenstain, Lanndtschreiber."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 697, S. 759