"Vdalricus(1), Dei gracia episcopus Patauiensis, jmperialis cancellarius. Vniuersis et singulis christifidelibus has nostras litteras inspecturis, salutem in Domino. Licet is, de cuius munere venit, ut a fidelibus suis sibi digne et laudabiliter seruiatur, eisdem multo maiora retribuat, quam valeant promereri, nichilominus tamen pia mater ecclesia de animarum salute sollicita eosdem spiritualibus videlicet indulgenciarum muneribus ad id consueuit imutare. Cupientes igitur fidelium mentes ex cordis affectu per pie deuocionis opera ad cultum diuinum allicere ac affectare, ut ecclesia sancti Jacobi in Rorbach(2) nostre diocesis congruis frequentetur honoribus, omnes et singulas indulgencias per reuerendissimos in Christo patres et dominos, dominos Bessarionem(3) episcopum Tusculanum, cardinalem Nicenum, Alanum(4) episcopum Penestrinum, cardinalem Auinionensem nuncupatos, Jacobum(5) tituli sancti Crisogoni, miseracione diuina sacrosancte Romane ecclesie presbyteros cardinales, iuxta suarum litterarum continenciam et tenorem datas et concessas, ratas et gratas habentes, ac eas auctoritate nostra ordinaria in subditos nostros extendentes, in Dei nomine confirmamus et approbamus. Jnsuper eciam omnibus vere penitentibus, confessis et contritis, qui dictam ecclesiam in festiuitatibus memoratis litteris insertis deuote visitauerint, aut ad ipsius reparacionem aut alia pro cultu diuino necessaria manus porrexerint adiutrices, de omnipotentis Dei misericordia et beatorum Petri et Pauli apostolorum eius auctoritate confisi, quadraginta dies indulgenciarum de iniunctis eis penitencijs misericorditer in Domino relaxamus. Harum quibus nostrum sigillum appensum est testimonio litterarum. Datum Patauie, quinta die mensis aprilis, anno Domini millesimo quadringentesimo sexagesimo octauo."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 706 (Ro 2), S. 768-769