"Reverendo in Christo patri ac domino, domino N(1). abbati monasterii Staynveldensis, ordinis Præmonstratensis, Coloniensis dioecesis, domino et patri colendo, frater Andreas(2), præpositus monasterii Slagensis, eiusdem ordinis Præmonstratensis, Pataviensis dioecesis, orationes ut tam humillimas quam devotas in Domino affectumque sinceræ charitatis cum paratissima ad quævis beneplacita voluntate semper paratis præmissis. Pia mater ecclesia, quibus communicavimus vivis, communicare debemus et mortuis et e converso, quibus non communicavimus etc. benigno compatitur affectu et inde salubri remedio, quibus in terris militamus, celeriori cursu ut pertingant ad æternæ claritatis præmium et id eciam felicius adipisci mereamur solicitius providere iuxta dictum apostoli ,Omnes morimur et quasi aqua dilabimur‘ et Job ,Homo natus de muliere etc.‘ Reverende pater, tenore præsencium cordis cum gemitu insinuamus vestræ paternitati venerabilem patrem et dominum Johannem(3), abbatem monasterii Strahowiensis, Pragensis dioecesis, ingressum viam carnis universæ ipsumque locum pastore et rectore orbatum, cuius ius patronatus ad vestram paternitatem spectare dignoscitur. Et ne paternitas vestra sicut – proch dolor – iam retrofluxis multis temporibus et hactenus in terris Bohemiæ(4) gestum esse sentitur decedente ipso venerabili patre res et bona ipsius prætacti monasterii Strahoviensis patre et rectore carentis in usus sæcularium converti, unde ipsi fratres professi monasterii præfati paupertate gravari et per intrusum orbari viderentur, sagaciter providere. Nam sicut ratio divina postulat et humana unicuique perhibere testimonium veritatis maxime autem nobis specialiter vocatis sinceræque charitatis vinculo adunatis. Quare vestræ paternitati venerabilem fratrem Johannem præsentium exhibitorem boni generis christianæ fidei parentibus legitime procreatum, eiusdem prædicti monasterii Strahoviensis expresse professum, bonum catholicum ac zelatorem orthodoxæ fidei, qui probabiliter contra ipsos christianæ fidei pestiferos turbatores ipsum totaliter depauperantes, solus propria in persona dimitat nobiscum in disctrictu parve distante a monasterio in parochiali ecclesia Sweraz(5), sibi per sedem apostolicam confirmata laudabiliter conversatum, harum testimonio litterarum tanquam patri abbati singulari aut etiam ad quoscunque requirentes declinaverit, duximus commendandum, supplicantes ac desiderioso cordis affectu pro et cum ipso rogantes, quatenus eundem benigne paterneque suscipere, susceptoque id onus regiminis, pastroralisque officii curam iniungere iuxta communem electionem unanimi de consensu tam fratrum monasterii quam canonicorum ecclesiæ Pragensis, iniunctoque gratiose confirmare, more pii patris, quod nobis ad gratam, imo in maiori perpetuo remerendam erga vestram paternitatem cedat complacentiam. - Ex monasterio nostro Slagensi, vicesima nona mensis novembris, anno Domini millesimo quadringentesimo septuagesimo, nostro sub sigillo præsentibus in fine appenso."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 433, S. 479-480