"Friderich(1) von Gottes gnaden Romischer kayser. - Ersamer geistlicher lieber andechtiger. Als die veindt aus Bohaym mit ainem mercklichen volk in vnser ||
furstenthumb Osterreich gezogen sein, vnd das mit rawb, prant, huldigung [?] vnd vervalgung der lewt beschedigen, auch das lannd in annder weg swerlich verderbt wirdet. Dem aber für zu komen, vnd zu befrüdung des lannds haben wir zway tausent zu rossen vnd tausent zu fussen, dich vnd annder vnnser preletten, die von stetten, vnd vnser vrbarleutt auff zway monad auffgenomen; darum die dann, acht zu rossen, außzuhallten vnd zuuersolden angeslagen sein, enpfelhen wir dir ernstlich vnd wellen daz du die bemellten zway monad vnserm getrewen lieben Jobsten Hawser(2), vnserm camrer, den wir zu jnnemer desselben anslags geordent haben, auf dieselben acht zu rossen alle wochen acht pfundt pfenning fur sold ausrichtest vnd gebest, damit d[as] man das zu bezallung derselben acht zu rossen gebrauchen mug, vnd damit nit verziehest noch sewmig seist. Wann, ob du darum sewmig sein, vnd wir des schaden nemen wurden, desselben schaden wollten wir vns zu dir vnd deinem gotzhaws hallten vnd dauon bekomen. Dauon so thue darein kain annders nit. Daz ist genntzlich vnser ernstlich meynung. Geben zu der Newen statt, an sand Franciscen tag, anno Domini etc. LXXVIto, vnnsers keysertumbs jm funffundzwainzigisten jare."||
||
Rechts unten: "Commissio domini imperatoris in consilio."||
Anschrift auf der Rückseite: "Dem ersamen geistlichen vnserm lieben andechtigen, dem brobst(3) zum Slegel."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 468, S. 525