"Wier Niclas(1), von Gottes genaden apt zw der Heyligen Coron(2), vnd der ganntz connvent daselbs, bekennen vnd thuen khundt offennlich mit dem brieff allen den, die jn sehen, horen oder lesen, das fuer vns kumen seyn vnser lieben purger jn der Plan(3) als fuer ier recht grundt herren vnd haben vns gemainicklich gepeten, das wier jn dy marckt recht pestatten, nach dem vnd vnser wirdigs gotzhawss vnd vnser heyliger orden pegabt vnd gefreydt ist. Nun haben wier angesehen ier gepett vnd den gemayn nutz vnd vnsers gotzhawss, darauff bestatten wier jn alle irer gerechtikeit vnd freyheyt von samztag pyß auf den montag(4) kauffen vnd zu uerkhauffen, wag vnd maß durch ab ze legen vnd auffzelegen, vnd dy strassen uber den wald(5) fuer den Klaffer(6) gein Passaw vnd jn das lanndt gein Payren traydt vnd salz(7) vngeuerlich jn vnd auß nach der freyhaitt vnsers gotzhawss, dy wier dar uber haben von der khayserlichen vnd kunigclichen maiestat, den haben ander vnser stett vnd marckt. Doch pegeren wir, das sy niemant jrren noch hynndern soll wider soliche vnnsers gotzhawss freyhaitt. Vnd des zw eyner waren vrkhundt vnd bestattung geben wier jn den brieff mit vnserm vnd vnsers conventz payden angehangen jnsigl. Der da geben ist anno Domini Mo CCCCo LXXVIII, des mitichen vor sandt Elspetten tag."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 476, S. 534