"Vdalricus(1), Dei gracia episcopus Patauiensis, ad futuram rei memoriam. Pastorali cura conmoniti, ea libenter annuimus, fauoreque beniuolo prosequimur, per que diuinus cultus augetur, salusque procuratur animarum. Sane oblata nobis pro parte honestorum dilectorum ~ judicis, consulatus ac tocius conmunitatis opidi in Haslach(2), nostre diocesis, supplex peticio continebat, quomodo jpsi de bonis eis a Domino Deo collatis pro salute omnium fidelium animarum missam vnam quottidianam(3) perpetuis temporibus celebrandam dotauerint atque fundauerint, prout hec et alia in litteris fundationis huiusmodi nobis exhibitis plenius vidimus contineri, deuota instantia supplicantes, quatenus huiusmodi dotationem et fundationem auctoritate nostra ordinaria approbare, corroborare et confirmare dignaremur. Nos vero deuotam et rationabilem illorum peticionem fauore prosequentes beniuolo et in Domino commendantes ac desiderantes, omnipotentis Dei laudem, Christique fidelium salutem ampliare ac procurare, dotationem et fundationem prefate misse perpetue ratas et gratas habentes, jpsas in omnibus suis articulis, punctis et ordinationibus juri et rationi conformibus et in huiusmodi fundationem et dotationem consueta auctoritate nostra ordinaria, dilecti in Christo Johannis Zobel(4), rectoris ecclesie parrochialis in Haslach, expresso consensu accedente approbauimus, corroborauimus et confirmauimus, atque approbamus, corroboramus et confirmamus per presentes. Volentes et auctoritate prefata decernentes fundationem hanc ita vt premittitur robur habere perpetue firmitatis. Harum quibus nostrum sigillum appensum est testimonio litterarum. Datum in ciuitate nostra Patauiensi, die vigesima mensis octobris, anno Domini millesimo quadringentesimo septuagesimo octauo."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 474 (S 335), S. 532