"Wir Georig(1), von Gottes genaden pfalltzgraue bey Rein, herczoge in Nideren vnd Obern Beirn etc. Bekennen offenntlich mit dem brief, das vns der ersame vnd andechtigen in Gotte vnnser besonnder lieb brobste vnd conuent des closters zum Slegl(2), vor dem walld gelegen, jre freyhaitbrieue(3), so sy von vnnseren vorfaren, keisern vnd fuersten von Beirn furbracht vnd vns mit diemutigem vleiss gebeten, das wir jne die zu confirmiren vnd zu bestaetten geruechten. Allso haben wir solich jr zimlich gebete angesehen vnd jnen darauf bemellt jr freyhaitbrief genedicklich confirmirt vnd bestaettet, confirmiren vnd bestaetten jne auch die wissenntlich mit dem brieue, wie sy die dann herbracht haben, vnd wollen sy auch allso dabey genedigklich beleiben lassen. Gebieten auf das allen vnnsern vitzdomben, ||
renntmeistern, lanndtschreibern, pflegern, richtern, casstnern, mauttnern, zollnern vnd allen anndern vnnsern ambtleuten vnd vnnderthonen, das jr die bemellten brobste vnd conuent bey bemellten jren freihaiten, wie uor stet, vnuerhindert beleiben lassen, bey vermeidung vnnserr vngenade vnd straffe. Vnd des zu vrkonnd haben wir vnnser jnnsigl an den brieue thun henngen, der geben ist zu Lanndshut, am eritag nach sand Margrethen tag, nach Cristi vnnsers lieben herrn geburde viertzehenn hundert vnd jm vierundachtzigisten jaren."||
||
Rechts auf der Plica: "Ad mandatum domini ducis. Fridericus electus et confirmatus. Patauiensis cancellarius."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 496 (S 349), S. 553