"In nomine sancte et indiuidue trinitatis, patris et filij et spiritus sancti. Amen. Nouerint vniversi et singuli presentes et futuri, hoc presens publicum transsumpti instrumentum visuri, lecturi, pariter et audituri. Quod nos Sigismundus Vorsthouer(1), decretorum licentiatus, canonicus ecclesie ac in spiritualibus curie Patauiensis commissarius generalis, ad instantiam et peticionem prouidi viri magistri Bernardi Mewerl(2), in decretis licenciati, causarum consistorij curie Patauiensis, ac venerabilis patris domini ~ prepositi monasterij gloriose virginis Marie in Slaga seu Plaga(3), ordinis Premonstratensis, Patauiensis diocesis procuratoris. De cuiusquidem procuracionis mandato coram nobis legittime extitit facta fides, omnes et singulos vtriusque sexus homines sua communiter uel diuisim interesse putantes, et quos infrascriptum tangit negocium seu tangere poterit quomodolibet in futurum. Ad videndum et audiendum infra scriptas litteras priuilegiorum seu indultorum ac confirmatorum ipsi venerabili patri domino ~ preposito et conuentui predicti monasterij in Slaga, dudum datorum et concessorum nonnullosque testes fide dignos et ydoneos de et super recognicionem sigillorum dictis litteris appendencium produci, recipi, iurari, ad jurandum admitti et examinari. Et postquam producti, recepti et examinati ac sigilla recognita fuerint, transsumi, exemplari, publicari et in publicam formam redigi, mandari auctoritatemque et decretum ordinarium interponi uel causam, si quam habeant, saltem racionabilem, cur premissa fieri non deberent allegandum per nostras certi tenoris litteras valuis seu portis ecclesie Patauiensis antedicte ad instar edictorum publicorum affigendas et inibi debite exequendas citari et euocari fecimus et mandauimus ad diem et horam infrascripta. Quibusquidem die et hora aduenientibus comparuit judicialiter coram nobis mag. Bernardus Mewerl, procurator predictus, quo supra nomine, et dictas litteras citatorias per discretum Vitum Flandrer(4), nuncium nostrum juratum, in valuis seu portis dicte ecclesie Patauiensis publice affixas ac inibi, vt moris est, sub diuinorum solemnijs debite executas et per eundem reportatas, reproduxit, citatorumque in eisdem contentorum non comparencium contumaciam accusauit, ipsosque contumaces reputari, et in eorum contumaciam nonnullas litteras quondam serenissimorum invictissimorum ac jllustrissimorum principum et dominorum, dominorum Henrici, Ottonis et jterum Henrici ac jterum Ottonis, ducum Bauarie ac comitum palatinorum Reni, Margarethe ducisse, necnon Ludwici Romanorum jmperatoris, Henrici, Ludwici et Georgij, moderni Bauarie ducum etc. confirmantes ac desuper confirmatores eorum veris sigillis in cordulis sericeis ac pressulis pergameneis impendentes sigillatas, vt prima facie apparebat, et scripture circumferenciales in sigillis eisdem sculpte clare demonstrabant in medium exhibuit, ac nonnullos testes fide dignos et ydoneos de et super recognicione sigillorum dictorum, quos admitti eorumque solita juramenta recipi, examinari et interrogari. Et postquam recognita fuerint, dictas litteras transsumi et exemplari ac in publicam formam redigi, mandari, auctoritatemque et decretum ordinarium per nos interponi, debita cum jnstancia pecijt atque postulauit. Nos tunc Sigismundus Vorsthouer supra nominatus, dictos citatos non comparentes neque huiusmodi diei termino satisfacere curam licet sufficienter et usque ad horam debitam expectatos reputauimus, prout merito erant, exigente iusticia contumaces, et in eorum contumaciam supradictos testes super recognicione dictorum sigillorum in forma juris recepimus et admisimus. Quibus quidem testibus huiusmodi litteris per nos ostensis et per eos ac eorum quemlibet visis successiue et inspectis, eisque per nos super recognitione eorundem sigillorum diligenter examinatis et interrogatis, dixerunt medijs eorum juramentis per eos et eorum quemlibet ad mandatum nostrum et in manibus nostris tactis scripturis sacrosanctis prestitis, et quilibet eorum dixit, prout ex armis et circumferencialibus in eisdem litteris sculptatis aperte declarabatur, credere sigilla eorum esse, quorum fore dicebantur. Quibus sic peractis, nos Sigismundus Vorsthouer prefatus, dictas litteras ad nos recepimus, vidimus, legimus, tenuimus, manibus nostris contrectauimus et diligenter inspeximus, jpsasque sanas, integras, non viciatas, non concellatas, neque in aliqua sui parte suspectas, sed omni prorsus vicio et suspicione carentes reperimus ac ipsas pro sufficienter recognitas habuimus et haberi volumus. Easquoque ad antedicti magistri Bernardi Mewerl procuratoris vlteriorem instantiam per notarium et scribam nostrum juratum infra scriptum transsumi et exemplari, publicari et in hanc publicam formam redigi mandauimus et fecimus, volentes et auctoritate nostra ordinaria, qua fungimur in hac parte, decernentes, quod huiusmodi transsumpto publico in judicio et extra ac vbicumque locorum de cetero detur et adhibeatur tanta fides, quanta ipsis originalibus litteris inferius de verbo ad verbum insertis et registratis et cum presenti publico transsumpti jnstrumento collationatis et auscultatis, data fuit et adhibita, ac daretur seu adhibeatur, si in judicio producerentur auctoritatem nostram ordinariam in hoc interponentes pariter et decretum. Tenores vero litterarum, de quibus supra fit mencio, de verbo ad verbum secuntur et sunt tales:||
||
.Wir, Heinrich [...] an sand Vrbans tag‘ [Urk 121: 25.5.1327]||
||
,Wir, Ott [...] ainunddreysigisten jar‘ [Urk 128: 17.2.1331]||
||
,Wir, Margareth [...] perchten tag‘ [Urk 137: 6.1.1341]||
||
,Wir, Ludwig [...] kaisertumes‘ [Urk 140: 18.9.1341]||
||
,Wir, Heinrich [...] ainsundfunftzigisten jare‘ [Urk 252: 10.6.1409]||
||
,Wir, Georg [...] vierundachtzigisten jaren‘ [Urk 496: 13.7.1484]||
||
Jn quorum omnium et singulorum fidem et testimonium premissorum presentes nostras litteras siue hoc presens publicum transsumpti jnstrumentum decreti nostri interposicionem in se continentem siue continens exinde fieri et per notarium publicum, scribamque nostrum juratum infrascriptum subscribi et publicari, sigillique nostri jussimus et fecimus appensione conmuniri. Datum et actum Patauie(5) in curie nostre solite residencie nobis inibi hora causarum consueta ad jura reddendum et causas audiendum pro tribunali sedentibus, sub anno a natiuitate Domini millesimo quadringentesimo octogesimo quarto, indiccione secunda, die vero mercurij vicesima octaua mensis julij, pontificatus sanctissimi in Christo patris et domini nostri, domini Sixti(6), diuina prouidentia pape quarti anno tredecimo, presentibus ibidem honorabilibus et prouidis viris dominis Andrea Windl(7) capellano capelle sancti Sixti in ambitu ecclesie Patauiensis, jtem presbytero Iohanne Prenner(8) plebano in Zellis et Hartungo Puehler(9) secretarijs reuerendissimi in Christo patris et domini, domini Friderici(10), electi et confirmati dicte ecclesie Patauiensis notarijs publicis, clericis Herbipolensis et Patauiensis diocesis, testibus ad premissa vocatis, rogatis et specialiter requisitis."||
||
[NOTARIATSSIGNET] "Et ego Georgius Euerdinger(11) de Wels clericus Patauiensis diocesis, publicus sacra jmperiali auctoritate ac officialatus curie Patauiensis notarius atque scriba juratus. Quia supradicte citacioni, execucioni, reproduccioni ac litterarum siue priuilegiorum exhibicioni, testium recepcioni, sigillorum recognicioni, earundem litterarum recepcioni, visioni, examinacioni, manuum contrectacioni, auscultacioni, collacioni et transsumpcioni pariter et decreto, omnibusque alijs et singulis premissis, dum sic vt premittitur coram prefato domino Sigismundo Vorsthouer commissario et per eundem fierent et agerentur, vna cum prenominatis testibus presens fui, eaque omnia et singula premissa sic fieri vidj et audiui, ac feci et peregi. Jdeo de ipsius domini commissarij mandato presentes litteras siue hoc presens publicum transsumpti seu exempli jnstrumentum manu alterius, me alijs prepedito negocijs, fideliter scriptum, exinde confeci, subscripsi, publicaui et in hanc publicam formam redegi, signoque et nominibus meis solitis et consuetis, vna cum eiusdem domini commissarij sigilli appensione consignaui, jn fidem et testimonium omnium et singulorum premissorum, rogatus et specialiter requisitus."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 497 (S 350), S. 554-556