"Ich Wolfganng Herleinsperger(1) zw Tannberg, ritter: Bekenne, das für mich komen ist Ruedolf Sneider(2) von Goldnaren als lehentrager des gotzhaws ze Rorbach(3), vnd bat mich mit vleis als lehenherrn, das jch jm die hernach geschriben zehent meiner erblichen lehenn geruechte zw verleyhenn. Deshalben hab jch angesehenn sein vleissig gebet vnd dem benanten Ruedolfen als lehentrager verlihenn vnd leich jn dew auch wissentlich jn kraft des briefs, was jch jm daran zw recht leyhenn soll oder mag, als solicher lehenn vnd lanndsrecht vngeuerlich. Er soll auch die zehent anstat des gotzhaws als lehenntrager jnhaben, nuczen vnd nyesen nach des gotzhaws notdurft, vnd mir vnd mein erben albeg am driten jare vnnser gewonnlich lehennstewer dauon geben, als hernach volligt. Item von erst auf ainem gut zw Moshaim(4) gantzen zehennt, dauon man gibt ain pfunnd pfening. Item aber auf ainem gut zw Hawtznperg(5) vnd ainer hofstat daselbs den zehent, dauon man gibt drei schilling pfening, gelegen jn Rorbeker pfarr vnd Veldner lanndgericht, meiner lehenschaft. Es sol auch der benant Ruedolf anstat des gotzhaws als lehentrager mir vnd meinen erben in allen sachen gehorsam vnd gewerttig sein als ander vnser lehenlewt, trewlich angeuarde. Mit vrkunnd des briefs. Mit meinem aigen anhangunden jnsigill, mir, mein erben an vnser lehenschaft vnuergriffenlich vnd an schaden. Geben zw Tannberg an sonntag letare zw mittervasten, nach Kristi gepurd tausent vierhundert vnd jm ainsvndnewntzkistenn jare."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 707 (Ro 3), S. 769