"Ich Bertlme von Starhemberg(1): Bekenn das fuer mich kam Ruedolf zu Golden(2), an der zeit zechmaister des gotshauss sannd Jacob zu Rorbach, vnnd bat mich mit diemuetigem vleis, daz ich jm als zechmaister desselbn gotshaus halbenn zehennt auf dem hof zu Kaernden(3) jn bemelter pharr vnnd Veldner lanndgericht gelegen, mein vnd meiner brueder lehnnschaft geruchten zuuerlechen, wann der von weilennd Oswalden Gaenngleins(4) sun jn Karnndten zu bestimbtem gotshaus geschafft waer. Daz ich also getan, verlihenn hab vnd leich jm den als zechmaister wissenntlich mit dem brief, was ich im zurecht daran verlechen sol oder mag. Also daz er oder ob er nit gewaer mit tod verging, abgesetzt vnnd ain anndrer zu lehenntrager darzue geordennt wuerde; so offt daz geschiecht, den selbenn zehennt er mir, meinen bruedern vnd vnnsern erben jn lehennsweis jnnehaben, nutzen, niessen, nemen, auch vmb solh lehen tun vnd in aller vordrung dauon gehorsam vnd gewertig sein sullen als rechtlehenns lanndes Oesterreich ob der Enns recht ist, angeuerd. Mit vrkund des briefs, besigelt mit meinem anhangundem jnnsigel, doch mir, meinen berurten bruedern vnnd vnnsern erben, on vnnsrer lehennschaft, rechtenn vnd vordrungen vnuergriffen vnd on schadenn. Der geben ist an suntag Judica in der vassten, nach Cristi geburd viertzehen hundert vnd im vierundnewntzigisten jar."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 523 (S 370), S. 589