"Ich Nyklas Eyban(1), burger zu Frydburg, beken fur mych vnd all meyn erben offnlych mytem brieff allen den er furkumbtt, sehentt, horentt oder lessntt, das jch mytt bolbedachtem mutt vnd gutem byllen zu der zeyt, do ich das rechtlych bolgetun macht, recht vnd redlych verkauft vnd zu kauffen geben hab Andre an der Daczepfmull(2), Elspeten seyner hausfrauen, allen jren erben, den zehntt auf dem Creyczhoff(3) jn sand Peters pfarr auffm Bynberg, der lehen rurtt von edlen vnd vesten Mathiasen Oder zu Geczndorf(4), an der zeytt pfleger zum Spryncznstayn, vm ayn suma gelcz, der jch von jm gancz ausgrycht vnd peczaltt pyn zu rechten tagen an allen schaden. Jch hab jn auch den eyngeantburtt mytt herren hantt vnd aller statt, so sy daruber bedurffen, aucz meyner, meyner erben gbaltt, nucz vnd geber jn jr, jerer erben gbaltt, nucz vnd geber, allso jn der beschayden, das sy, all jr erben nu furan mytem benanten zehntt allen jren frumen betrachten mugen mytt verseczen, verkaufen, bem sy bellntt an meyn, aller meyner erben vnd an maenyklych von vnseren begen jerrung vnd byder sprechen. Byr seyn auch solichs kauffs zu recht jer rechtt gebern vnd furstantt fur all rechtlych ansprach, alls oft jn des nott geschicht mittem rechten alls solychs kaufs vnd lehncz gucz jm lantt ob der Enss recht jst angefarlich, vnd bas byr, vnser erben bider solychs anerhuben krygten oder rechten, das haben bir an aller statt vnrecht vnd verloren vnd seu gegen vnss recht behabtt vnd gebunen, dreulych vnd vngefarlych. Des zu aynem baren staten vrkuntt gyb ich jn den brieff, besygldt vnd bestatt myt des edlen vnd vesten Mathiassen Oder zu Geczndorf, an der zeytt pfleger zum Spryncznstayn alls lehen herrn aygen anhangundem jnsygl, doch jm vnd all seyn erben an jerer lehnschaft, rechten vnd fodrungen vnuergryffenlych vnd an schaden. Vntter das jnsygl jch mych verpyntt fur mych, meyn hausfrau, all vnsser erben, alles bar vnd stat zu halten, doster gegenburtyg bryf jnheldt vnd ausbeyst, dreulych vnd vngefarlych; der geben jst nach Kryst gepurd vierczehen hunndertt vnd jn dem vier vnd neuczigysten jar, an mantag vor sand Jorgntag, des heylygen rytters."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 526 (S 371), S. 591-592