"Wir Cristoff(1), von Gottes genaden bischoue zu Passaw: Bekennen, daz fur vns komen sind die zechbrobst des gotshaws zu sand Nicla zu Haslach, vnd haben vns mit glaublichen vrkunden bericht, wie weilend vnnser lieber getrewer Sigmund Vorawer(2), richter zu Haslach, dem benanten gotshaws vmb seiner sell haill willen das gut zu Hartmansdorff(3) in sannd Peters pfarr vnd Haslinger lanndgericht gelegen, vnnser vnd vnnsers stifts lehenschaft zu merung des gotshaws verschaft hat, vns darauf diemutigklich gebeten, daz wir solh gescheft als lehenherr zu besteten, vnd jn das benant gut mit seinen zugehorungen jn des benanten gotshaws hannden zu uerleihen gnedigklich geruchten. Vnd wan wir sonnderlich genaigt sein, den gotsdinst zu furdern vnd ze meren, haben wir auf jr vleissigs bete solh gescheft als lehenherr bestet vnd jn das benant gut mit seinen zugehorungen verlihen, vnd bestetten, leihen in das wissennlich vnd in kraft des briefs, waz wir jn von rechtens wegen daran bestetten vnd verleihen sullen oder mugen, also daz sy vnd jr nachkomen zechbrobst des bedachten gotshaws dasselb gut mit seinen zugehorungen nun furbaz von vns vnd vnnserm stift in lehensweis zu des bestimbten gotshaws hannden jnhaben, nutzen vnd nyessen sullen vnd mugen. Vnd aloft es zu vallen kumbt, daz wir oder vnser nachkomen bischouen zu Passaw mit tod vergen, daz alsdan die zechbrobst des benanten gotshaws, wer die zuzeiten sein werden, das bestimbt gut mit seinen zugehorungen von vnnsern nachkomen vnd dem stift in lehensweis enphahen vnd zu lehen nemen, als lehens, lands vnd vnnsers stifts recht ist, vns vnd vnnserm stift an der lehenschaft alzeit vnuergriffen, vngeuerlich. Mit vrkund des briefs, geben zu Passaw, an montag sand Agatha tag, nach Cristi geburd vierzehen hundert vnd jm achtvndnewnzigisten jar."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 537 (S 379), S. 604-605