"Cristofferus(1), Dei gracia episcopus Patauiensis. Vniuersis et singulis christifidelibus sincero corde Deum colentibus, ad quos presentes nostre littere peruenerint, salutem in Domino sempiternam. Quoniam animarum salutem tunc effectiue procurare credimus, dum fidelium mentes ad exercendum pietatis opera et deuocionis studia muneribus allectiuis feruencius inuitamus. Cupientes igitur, vt ecclesia sancti Jacobi apostoli in Rorbach(2), nostre diocesis, congruis frequentetur honoribus: Omnes et singulas jndulgencias per reuerendissimos dominos cardinales ad eandem ecclesiam iuxta litterarum suarum de anno currenti vicesima nona die mensis aprilis(3) emanatarum continenciam et tenorem racionabiliter datas et concessas, ratas et gratas habentes, ac eas auctoritate nostra ordinaria in subditos nostros extendentes, in Dei nomine confirmamus. Jnsuper etiam omnibus christifidelibus vere penitentibus, confessis et contritis, qui prefatam ecclesiam in festiuitatibus litteris memoratis dominorum cardinalium insertis, deuote visitauerint aut ad ipsius reparacionem manus porrexerint adiutrices, quociens id fecerint, quadraginta dies indulgenciarum de iniunctis eis penitencijs de omnipotentis Dei misericordia ac beatorum Petri et Pauli apostolorum, eius auctoritate confisi, misericorditer in Domino relaxamus, harum testimonio litterarum. Datum Patauie, die decima nona mensis [maij (?)](4), anno Domini millesimo quadringentesimo nonagesimo octauo."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 708 (Ro 4), S. 769-770