"Wir Wigilevs(1), von Gottes genaden bischoue zu Passaw: Bekennen, das fur vns komen ist vnser getrewer Hanns Meltzner(2), zechmaister sand Nicla gotshaws zu Haslach, vnd bat vns diemutigklich, das wir jm als zechbrobst das gut zu Egkhertzrewt(3) in der Voraw, in Pewrbegker pfarr vnd landtgericht, vnd das gut zu Hartmansdorf(4) in sand Peter pfarr vnd Haslinger landtgericht, vnnser vnd vnnsers stifts lehenschaft zu des bemelten gotshaws handen gnedigklich geruchten zuuerleihen. Wan die mit kauf vnd gescheft darzue kumben weren, haben wir angesehen sein vleissig bete vnd jm obgenante guter mit jren zugehorungen zu des bemelten gotshaws handen verlihen, leyhen jm die auch wissennlich mit dem brief, was wir rechtlich daran verleihen sullen oder mugen. Also daz er zu des gemelten gotshaws handen vnd frumben mag jnhaben, nutzen vnd nyessen. Er vnd yeder sein nachkomen, welh yezn zeiten zechlewt sein werden, vns getrew vnd gewerttig sein vnd dauon thun, was ein lehensman seinem lehenherrn pflichtig ist, als er vns gelobt hat. Auch wann es zu vallen kumbt, von einem yeden bischof vnd nachkumben empfahen, wie lehens, lannds vnd vnnsers stifts recht ist ongeuerde. Mit vrkund des briefs. Geben zu Passaw, an dem heiligen Auffart abent, nach Cristi geburde funfzehen hundert vnd jm annderen jar."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 556 (S 394), S. 628-629