"Vermergkht die abred zwischen dem wolgebornen herren, herrn Gregorien von Starhemberg(1) etc. als vogt des wirdigen gotzhaus sanndt Madalena zu Epping(2) ains, vnnd des geistlichen herren Casparn Vierniesser(3), pfarrer zu Rarbach annders tails, von wegen der gefallung vnnd opfer bey gedachter kirchen zu Epping, die weil kirchfart daselbshin jn jrem fürganng ist, beschehen, jn mass artickhls weiss ||
hernach folgt: Erstlich sol gedachtem pfarrer von Rarbach, wann er oder sein gesellen zu Epping jn sanndt Madalena gotzhaus mess singen oder lesen, das opfer jn gellt, dieweil die ob alltar steen, on mittel volgen. - Zum anndern sol abermals jn der taffl der gellt samlung, dartzu auch jm stockh, gedachtem pfarrer der drytail vnd nit mer gedeychen. - Zum dryten was bey gedachtem gotzhaus gefellt, dieweil vnnd die gnad oder kirchfart jn jrem fürganng ist, es sein kass, air vnnd hennen, darjnn sol jm pfarrer abermals der drytail vnnd nit mer vnnd die anndern zwen tail dem gotzhaus nachfolgen. - Zum vierden was vber solhs nichtz ausgenomen zu gemellten gotzhaus geopfert oder geben wirdet, das sol on als mittel ganntz vnnd gar beym gotzhaus beleyben. - Vmb solhen ausgezaigten gebürenden vnnd abgeredten drytail sollen der pfarrer oder sein gesellen all sambstag nacht, auch dartzu an anndern veirnächten, damit die kirchfart dester merer ansehens trage, vesper ze singen schuldig sein. Darfür sol ains pfarrer gesellen ain jar vom gotzhaus zway pfundt, vnnd von aim pfarrer ain pfundt pfenning geben vnnd geraicht werden. - Vnnd wann die kirchfart abgeet vnnd nit mer jn jrem furganng vnnd haimsuchung sein würde, ist dise abred auch tod vnnd ain nullitæt vnnd sol verrer darnach gehallten werden, wye es dann vorher von allter gebraucht vnnd gehanndlt worden ist on geuerd. Diser abred zetl sind zwo jn gleicher lawt aufgericht, geschriben vnnd ausainannder geschnitten vnnd yeder tail aine angenomen. Beschehen zu Pirhenstain, sontags vor Erasmi, anno Domini etc. XVo vnnd jm funfften."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 560 (S 397.a), S. 632