"Wir Johanns, graf zu Hardegg(1), zu Glatz vnnd im Machland, obrister erbschenkh in Österreich vnnd druchsess in Steir etc. Bekhennen das für vns komen ist Magdalena Weygkhhartzpergerynn(2) weylend vnnsers richter am Klaffer Thoman Weikhartzperger(3) seligen verlassen witib, vnnd pat vnns mit diemüetigem vleiss, das wir jr halben zehent auf newen gütern am Klaffer(4) vnnd zu Freindorff(5), zu baiden dorffern gelegen, geruchten zu verleihen. Wann den gedachter jr man Thoman Weikhartzperger vormals vonn weilennt vnnserm vatter graf Hainrichen(6) seliger gedechtnuss vnd nachmalen von vns zu lehen getragen hette. Also haben wir angesehen jr diemutig vleissig bethe vnd jr darauf den gemelten zehent mit seinen zugehorungen gnädigklich verlihen, verleihen jr den auch hiemit wissentlich jn crafft des briefs, was wir jr zw recht daran verleyhen sollen vnnd mogen, also das sy vnnd jr erben den nw hinfür von vnns vnnd vnnsern erben jn rechtlehens weis jnhaben, nutzen vnnd nyessen sollen vnnd mogen, als rechtlehens vnnd lannds zw Österreich ob der Enns recht ist, doch vnns vnnd vnnsern erben an vnnser lehenschafft, vordrung vnd gerechtigkait vnuergriffenlich vnd an schaden. Mit vrkhundt des briefs, besigelt mit vnserm anhangendem jnsigel. Geben zu Hainrichsburg(7) jm Machlanndt, an sand Sebastians tag, anno Domini funfftzehundert vnd jm funftzehenden."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 569 (S 405), S. 642-643