"Von Gots genaden wir Ernst(1), administrator des stiffts Passaw, phaltzgraue bey Rheyn, hertzog in obern vnd nidern Bayrn etc. Bekhennen, das wir vnserm getreuen Niclasen Dräxsel(2) anstat vnd zuhannden sant Nicla gotshaus zu Haslach als desselben zechmaister vnd lehentrager das guet zu Eckertzreuth(3), mer ain guet in der Voraw in Peurbeckher pharr vnd landtgericht, item vnd das guet zu Hartmansdorff(4) in sant Peters pfarr vnd Haslinger landtgericht gelegen, so von vns vnd vnsern stifft Passaw zu lehen rurn vnd geen, zu rechtem lehen verlihen haben, verleihen jme die auch mit jren zugehorungen, was vnd souill wir jm dan billich von lehen vnd rechtens wegen daran verleihen sullen vnd mugen. Darauf hat er vns gewondlich lehenspflicht gethan vnd an anderstat gelobt, vns als administratorn vnd vnsern stifft Passaw getrew vnd gewer zu sein, vnsern vnd vnsers stiffts frumen zu furdern, schaden zu warnen vnd zu wennden, vnd die verschwignen lehen, wo er der wissen hette oder erfure anzuzaigen, auch von den lehen, so jme wie obgemelt verlihen sind, geuerlich nichts verandern oder entziehen lassen, noch ichts on vns als lehenherrn wissen vnd bewilligung daraus zuuerkhomern vnd sich sonst in allen sachen hallten als ain getreuer lehensman von solher lehen wegen zu thun schuldig ist an geuerde. Des zw vrkhundt vnder vnserm anhangendem jnnsigl. Geben zu Passaw, am heiligen liechtmeßtag, nach Cristj vnsers lieben herrn geburde funffzehenhundert vnd jm funffvndzwaintzigisten jar."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 583 (S 419), S. 657