"Ich Pangracz Beham(1), der zeit phleger ze Mauttern: Bekhenn fur mich, all mein erben, alls gwallttrager anstat vnnd in namen Anna, meiner lieben hausfrauen, weilenndt Pernharten Trebinger(2), ettwan burger zw Lynncz, Warbara, seiner hausfrauenn, baider seligen eleibliche tochtter, mit disem offen brieff allen, den er furkhumbt, das ich laut aines verschriben gwallt des datum stet, so mir von gemelltter Anna, meiner lieben hausfrauen gegeben vnd vberantburt worden, recht vnnd redlich verkauft vnnd kheufflich ze khauffen geben hab dem ersamen vnnd weysen Paulsen Werder(3), apotegkher vnd burger zw Lynncz, Vrsula, seiner hausfrauen vnd jeren baiden erben, nemlich ainen stadl vnd wisen(4) daselbs zw Lynncz jnn der vorstat, an der ainen seyten an des Spitlpaurn(5) wisen, vnnd mit der anndern seyten an des Anthony Gartner(6) grundt gelegen, so meiner gemellten hausfrauen an jerem vaterlichen vnd muetterlichem erbfall zuegetaillt worden, wie es mit march vnd zaun vmbfangen ist. Darauff nit mer leydt dann vnserm genedigisten herrn ~ dem lanndsfursten alle jar jarlich zw sanndt Jorgen tag ain Wiener pfening. Allso hab ich jme gemellten statl vnd gartn mit allen den eren, rechten, nuczen vnd gesuechen so von altter darczue gehort vnd dauon bekhumen mugen, besuecht vnd vnbesuecht, mit ganczer furczicht in crafft dicz briefs, aus mein alls gwallttrager, Anna meiner lieben hausfrauen vnd aus vnnser baider erben nucz vnd gwer in gemelltts Paulsen Werder, Vrsula seiner hausfrauen vnnd jeren baiden erben nucz vnd gwer mit gerichts hannden vnd aller stat eingeanntburt vmb ain suma gellts, der jch von jnen an allen schaden ausgericht vnnd beczallt worden bin. Darumben sy vnnd all jr erben nun furpaser mit gemellttem stadl vnnd wisen, jerer zuegehorung, allen jeren frumen vnd nucz damit mugen besuechen durch jnhaben, nuczen vnnd niessen mit verseczen, verkhauffen, schaffen, machen vnd geben, wem, wohin vnd wie sy verlusst, auch damit handlen, thuen vnnd lassen alls mit anndern jeren aigenthafften guettern an mein, anstat alls gwallttrager gedachtter Anna, meiner lieben hausfrauen vnnd vnser baider erben, auch von menigklichs von vnnsern wegen einredt, hindernuß vnnd widersprechen angeuerde. Jch obgenanntter Pangracz Peham alls gwallttrager meiner mergemelltten hausfrauen Anna vnnd all vnnser baider erben sein solichs khauffs vmb gemelten stadl vnnd wisen gedachts Paulsen Werder, Vrsula seiner hausfrauen vnnd jeren baiden erben recht getrew sworn vortreter vnnd furstanndt gen allermenigklich, wo wann vnnd alls offt jnenn des zw recht not vnnd durfft beschiecht, wie dann solichs khauffs gwerschafft, lanndes ob der Enns vnnd der stat Lynncz recht jst, aber angeuerde. Gienng in aber mit recht icht daran ab, des sy ainicherlay schaden namen, wie der genennt werden mochte, khainen ausgenumen, denselben mugen sy woll haben, suechen vnnd bekhomen zw mir, meiner hausfrawen, laut des gwallts, auch zw vnnsern erben, vnnd darczue auf allen vnnsern hab vnd guettern, anligunden vnd varunden, so wir jecz haben oder khunftigclich gewinnen, jnner oder ausser lanndes, wo die gelegen, nynndert noch nichts ausgenumen, sich der mit gerichts hannden vnderwynden, jnhaben, nuczen vnd niessen, bissolang sy jeres genomen schaden enndtricht vnd beczallt worden sein, treulich vnd vngeuerlich. Zw vrkhundt dicz brieffs mit der fursichtigen ersamen vnnd weisen Jacoben Ottmar(7), der zeit burgermaister zw Lynncz, vnd Jorgen Huetter(8), statrichtter daselbs, aigen anhangunden jnsigln verfertigt, die ich laut des gwallts anstat meiner hausfrauen Anna mit vleis darumben erbetten hab, doch jnen, jeren erben vnnd jnsigln an schaden. Darunder ich mich alls gwallttrager gedachtter meiner hausfrauen Anna, alles ob verschriben war, vest, stat vnd vnczerbrochen hallten, bey aides pflicht verbunden haben. Geben an montag nach dem sontag Jnuocauit in der vasten, nach Cristy geburde funffczehen hundert vnd darnach jm achtundczwainczigisten jare."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 591 (S 424), S. 664-665