"Ich Jorig Diendoffer(1) zw Gneissnnaw: Bekhenn, das fur mich khamb maister Steffann Zymerman(2), burger zw Rorbach, vnd hat mir anzaigt, wie Jorg Weber(3) zw Gollnaren, vorhin zechmaister des wirdigen gotzhaws sand Jacob zw Rorbach gebest, der mit [tod] abgangen, auch lehenntrager bemellten gotzhawss, des zehennt halben auf der Jnnern Öd(4), vnd die pfarmenig, das zw Rorbach jne erwellt zw ainem lehenntrager. Der selb Steffan Zymerman alls lehenntrager [kam] vnd bat mich mit vleyss, jme alls zechmaister vnd lehenntrager des gedachten gotzhaws die zway taill zehennt auf der Jnnernod jn Sarlennspeckher pfarr vnd Velldner landtgericht gelegenn, meiner lehennschafft geruechte zw verleyhenn. Hab ich angesehenn sein zymlich gebet vnd jme an stat obgenanntten gotzhawss alls ainem lehenntrager die verlihen hab, leich jme die auch wissentlich mit vnd jn crafft des briefs, was ich jm an stat des wirdigen gotzhawss sand Jacob daran verleyhenn soll vnd mag, also das er vnd sein nachkhomen alls lehenntrager die gemellten zway taill zehennt mit jeren zuegehoren jn lehenns weyss jnhaben, nützen, niessen, vnd alls offt es sich vermandt widerumb lehenn nehmen, auch mir vnd meinen eriben albeg des nachsten sonntags nach sand Merttenn tag am drittenn jar davon geyn Gneyssnnaw raichen vnd geben funffvndviertzigkh phening, auch jn aller vodrunng davon gehorsam vnd gebertig sein, alls rechtlehenns, landes Osterreich ob der Enns recht [ist], ongeuar. Zw vrkhundt mit meinem anhangunden jnsigill, doch mir vnd meinen erbenn an der lehennschafft rechten vnd vodrung vnuergriffen vnd on schadenn. Der brief ist geben an freytag nach sonntag Jubilate, nach Cristi vnsers lieben herrenn geburde fünffzehenn hundert vnd jn dem dreyssigistem jare."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 596 (S 428), S. 668-669