"Ich Erasm herr von Starhemberg(1) etc. Bekhenn, das fur mich khumen ist Hanns von Sexing(2) mit antzaigung, wie Oswoldt Lechner(3) als zechmaister vnnd lehenntrager des gotzhaus sannd Jacob zw Rorbach halben zehenndt auff dem hof zw Kharnndten(4) in Rorbegkher pharr vnnd Veldner lanndtgericht gelegen, von mir zw recht lehen gehabt vnd vermug aines lehennbrieffs emphanngen hett, newlicher zeit mit dodt abganngen war vnnd bat mich darauff vnndertheniges vleiss, jme als jetzigem zechmaister vnnd lehenntrager ernennts sannd Jacobs gotzhaus zw Rorbach denselben zehenndt zuuerleichen geruechen. Welhes sein vleissig bitten jch angesehen vnnd jme als jetzigem zechmaister vnnd lehenntrager bestimbts gotzhaus obernennten zehenndt mein vnnd meiner vettern, herrn Jheronimusen(5) vnnd herrn Paull Jacoben(6), herrn von Starhemberg etc. gebrueder lehennschafft verlichen, verleich jme den auch hiemit wissenntlich in chrafft des brieffs, was jch jme zw recht daran verleihen soll, khan vnnd mag. Also, das er vnnd all nachkhumbendt zechmaister vnnd lehenntrager angeregten zehenndt nu furpaser von mir, ernennten meinen vettern vnnd vnnsern erben jn rechtlehenns weiss jnnhaben, nutzen, niessen, vnnd jeder gepurlichen zeit, wann sich der zehenndt durch den lehennherrn oder lehenntrager verwanndlt vnnd gefellt, nemben; auch in aller vorderung dauon gehorsam vnnd gewertig sein sulle, wie dann rechtlehenns vnnd lanndes Österreich ob der Enns recht ist, angeuerde. Des zw vrkhundt mit meinem aigen hierangehanngen jnnsigl besiglt, doch mier, ernenntten meinen vettern vnnd vnnsern erben an vnnser lehennschafft rechten vnnd aller vorderung vnuergriffen vnnd dem jnnsigl an schaden. Geben auff Wildperg(7), am suntag vor der auffart Christj, nach desselben vnnsers lieben herrn geburde funfftzehen hundert vnnd jm vierunduiertzigisten jar."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 605 (S 433), S. 675