"Ich Walthasar von Presing(1), freyherr zum Stain, romischer khunigclicher maiestat ~ vnnsers allergenedigisten herrn, rat vnnd lanndshaubtman im Osterreich ob der Enns: Empeut dem erwirdigen geistlichen herrn, herrn Georgen(2), brobst zum Schlegl vnnd dem conuennt daselbst, mein dinst in gutem willen zuuor. Mir hat der edl vnnd vesste Cristoff von Reichenburg(3), haubtman zu Rain, mit beswer wider euch anpracht, wie wol weylennd fraw Barbara gebornne von Walsse(4), weylennd graf Sigmundts von Schaunburg(5) gelassne wittib, all vnnd yedlich jr herrschaftn, schlosser, ambter, ligendt vnnd varend gueter, durch ein freie ledige vbergab weylennd khaiser Maximilian(6) hochloblicher gedechtnuß, frey ledeglichen vbergeben vnnd vermacht. Welche gerechtigkhait nachmals sein khaiserliche maiestat in weylennd herrn Reinprechtn(7) vnnd herrn Hannsn von Reichenburg(8), seinen een vnnd vattern durch ein freie gab gewenndt. So hetten sich doch des alles vnangesehen vnnd vnbedacht, das all vnnd ydlich ansprecher, so zu genannter frauen Barbara verlassen hab vnnd gueter, spruch vnnd gerechtigkhait vmb erbschafft oder in annder weg zuhaben vermaint: Erstlichen an hochgemelter khaiserlichen maiestat hof, vnnd letzlich fur seiner maiestat Niderosterreichische regierung zu rechtlicher verhor, austrag vnnd erkhanntnuß im possessorio gewesen vnnd beschaiden worden weylennd graf Hannß von Hardegkh(9) anstat seiner hausfrauen vnnd derselben mituerwondtn, wider verpot der rechtn, das niemandts sein selber richter sein, noch im hanngenden rechtn etwas gweltigs furnemen soll, sich neben anndern ambtern vnd guetern, des ambts am Claffer vnnd zu Freindorff(10) mit dem wald vnnd allen zuegehorungen, so gedachter frauen Barbara von Walsse erblich mit taillung zu Nider Walsse zuegestannden, auch sy bis in jren todt jnnen gehabt vnnd vnnder jr verlassen, aus aignem gewalt einzunemen vnnderstannden, vnnd in anhanngendem rechtstrit als ain kriegpers gut in euch durch ainen vermainten khauf gewendt. So aber ytzo durch der hochloblichen Niderosterreichische regierung enntliche rechtliche erkhanntnuß vnnd enntvrtl ausfindig worden, das graf Cristoffen von Hardegkh(11) als erb seines vattern vnnd mueter, auch herr Schweickhartn von Gundlfing(12), freyherrn clag, ansprach vnnd begern Niderwalsse(13), desselben zuegehorung vnnd aller anndrer weylennd mer berurter frauen Barbara von Walsse verlassner gueter halben, muessig vnnd ledig erkhennt worden, vnnd also clar vnnd lautter an tag khomen, das graf Cristoff vnnd seine eltern zu vorgemelter frauen Barbara von Walsse hab vnnd guter, die sy durch jr freie gab vergeben, gar khain pilliche ansprach gehabt, vnnd euch des bemeltn ambts am Claffer vnnd zu Freindorff ganntz vnpillicher weiß vnnderstannden, in hangendem rechtstrit vnnderwunden vnd vber ainen ausganngen abschid vnpillich jnnen gehabt, auch als ain khriegpar gut euch zuuerkhauffen gar nicht macht gehabt, sonnder jm solch ambter vnnd guter rechtlichen zuegehortn, vnnd durch die gesprochen enndt vrtl damit die vorberurten zwo vbergaben becrefftigt, rechtlichen zue erkhenndt, so mocht er doch von euch als jnnhabern berurts ambts vnnd guter, derselben abtrettung guetlich vnnd on recht, sambt dauon gefallen nutzung, vber sein gutlichs ersuechen nit bekhomen. Des er schaden nembe, derhalben er spruch vnd vorderung zu euch het, vnnd rechtens notdurfftig war, das jch jme der billichait nach bewilligt, emphil ich euch hierauf in namen hochgemelter khunigclicher maiestat, das jr euch obberurter sachn halben mit gedachtem von Reichenburg gutlich veraint, vnnd jne derhalben genntzlich vnclaghafft machet; wo jr aber solches nit schuldig zu sein vnnd dawider ainicherlaj gegrundt einred zu haben vermaint, alß dann von heut dato vber sechß wochen, der jch euch vierzehen tag fur den erstn, vierzehen tag fur den anndern, vnnd vierzehen tag fur den drittn vnd letsten enntlichen recht tag setz vnnd benenn, vor mir vnnd den beysitzern, oder so jch auf denselben tag nicht recht hielt, alß dann auf die obberurt clag, des so jr euch dawider durch verzuglich einred, oder in der haubtsach zu behelffen vermaint, in topplter schrifft fur mich erleget, vnnd dann verrer nach gebrauch des gerichts, auf des so der clager darauf weiter einfurn wirt, verfart vnnd nicht minder auf den negstn gerichts tag darnach, so jch zu recht sitzn wird, erscheinet, will jch nachmallen sambt den beysitzern, auf des so jr zu baiden taillen in recht furbringen werdt, was recht ist, hanndln vnnd ergeen lassen, dann jr gelobt dem allem oder nit, nicht minder wirt, auf des anndern gehorsamen taills anrueffn, was recht vnnd lanndsbreuchig ist, gehanndlt vnnd im rechtn verfarn werden, wie sich des seiner ordnung nach zuthun geburt. Darnach wisst euch zu richten. Actum Lintz, den letztn tag februarj, anno ~ im sibenvnndviertzigisten."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 608, S. 677-678