"Ich Georg von Ödt(1) zw Ernegg ~ Bekhenne, das fur mich alls den eltisten des namens von Ödt khomen ist der erber Hanns Lettzelter(2), burger zw Rorbach, alls lehenntrager des wirdigen gotshaus sanndt Jacob zw Rorbach, hiemit antzaigung, wie er von weyllenndt meinem vettern(3) salligen die hernach benennten zehent: Item erstlich auff zwayen guettern zw Hungernperg(4) vnnd auff ainer hofstat daselbst, vberall zway thayl zehennt, jn Altenfeldner pharr vnnd Veldner lanndtgericht gelegen, zu rechtlehen gehabt vnnd vermugen aines lehennbriefs emphanngen hette. Batte mich gehorsames vleis, nachdem sich soliche zehennt von meines vettern salligen ableiben wegen widerumben lehen zenemen geburet jme die selben zuuerleihen geruechen. Welches sein gehorsames bitten jch angesehen vnnd jme die berurtten zehent mein vnnd meiner gebrueder(5) lehenschafft verlihen, verleich jme die auch hiemit wissenntlich jn khrafft dits briefs, was jch jme zurecht daran verleihen soll, khann vnd mag. Allso das er, sein nachkhomen, an stat berurts gotshaus die angereggten zehennt, jerer zuegehorung nun furbas von mir, meinen gebruedern jn rechtlehens weis jnnhaben, nutzen, niessen vnnd yeder geburlicher zeit den drittjarigen lehenndienst. Desgleichen wann es sich, es sey durch den lehennherrn oder lehentrager vermandt, die lehen nach gnaden raichen vnnd emphahen, auch jn aller fordrung dauon gehorsam vnnd gewerttig sein, wie dann rechtlehens vnnd lanndes Österreich ob der Enns recht ist ongeuerde. Des zw vrkhundt, besiglt mit meinem aignen anhanngunden jnnsigl, doch mir, meinen erben, an vnnser lehenschafft rechten vnnd aller fordrung vnuergriffen vnnd dem jnnsigl an schaden. Geben zw Getznndorff, am monntag vor Johannes Baptiste, jm funfftzehenndert [!] vnnd zwayvnnd funftzigisten jar."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 611 (S 437), S. 681-682