"Ich Görg von Ödt(1) zw Ernnegg: Bekhenne [das] fur mich alls den eltisten des namens von Ödt khomen ist der erber Steffan Zymerman(2), burger zw Rorbach, alls lehentrager des wirdigen gotshaus sandt Jacob zw Rorbach, hiemit antzaigung, wie er von weyllenndt meinem vettern(3) salligen die hernach benennten zehennt: Item erstlich am Ruedatzhof(4) vnnd auff ainem guet zw Neindling(5), da etwan Steffan Leittner(6) aufgesessen ist, ganntzen zehent. Item mer funff thayll zehent zw Altenhofen(7). Item mer auff zwayen hofstetten zw Fridendorff(8), auff yeder drittayll zehennt. Item mer auff ainer hofstat zw Haslpach(9) ganntzen zehennt, jn Rorbegger vnnd Altennfeldner pharr vnnd Veldner lanndtgericht gelegen, zu rechtlehen gehabt vnnd vermugen aines lehenbriefs emphanngen hette. Batte mich gehorsames vleis, nachdem sich soliche zehent von meines vettern salligen ableiben wegen widerumb z‘lehen ze nemen geburet, jme die selben zuuerleihen geruechen. Welches sein gehorsames bitten jch angesehen vnnd jme die berurtten zehennt mein vnnd meiner gebrueder(10) lehennschafft verlihen, verleich jme die auch hiemit wissenntlich jn chrafft dits briefs, was jch jme zurecht daran verleihen soll, khann vnnd mag. Allso das er, seine nachkhomen, anstat berurts gotshaus die angereggten zehennt, jrer zuegehorung nun furbas von mir vnnd meinen gebruedern jn rechtlehens weis jnnhaben, nutzen, niessen vnnd yeder geburlicher zeit den drittjarigen lehendiennst. Desgleichen wann es sich, es sey durch den lehennherrn oder lehenntrager vermanndt, die lehen nach gnaden raichen vnnd emphahen, auch jn aller fordrung dauon gehorsam vnnd gewerttig sein sollen, wie dann rechtlehens vnnd lanndes Österreich ob der Enns gebrauch vnd recht ist ongeuerde. Des zw vrkhundt, besiglt mit meinem aignen anhanngunden jnnsigl, doch mir, meinen erben an vnnser lehenschafft rechten vnnd aller fordrung vnuergriffen, vnnd dem jnnsigl an schaden. Geben am monntag vor Johannes Baptiste, jm funftzehen hundertt vnnd zwayvnndfunfftzigisten jar."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 612 (S 438), S. 682-683