"Ich Georg Perlshaimer(1) zu Eckhersham: Bekenn, das fur mich komen ist der erber Hanns Gartner(2), burger zu Rorbach, vnd path mich mit vleiss, das jch jme als yezigem zechmaister vnd lehentrager des wirdigen gotshaus sand Jacob zu Rorbach die zway tail zehent auf dem guet in der Jnndernod(3) in Serlspeckher pharr vnd Veldner lanndtgericht gelegen, mein vnd Susana meiner hausfrawen lehenschaft geruechte zuuerleihen. Das jch gethon vnd jme die anstat bemelts gotshaus verlihen. Leich im die auch hiemit wissentlich in crafft diz briefs, was ich jm zu recht daran verleihen sol vnd mag. Also das er als lehentrager des gotshaus den berurten zehent, seiner zuegehorung, nun furpas von mir vnd meiner hausfrawen in lehens weis mag jnnen haben, nuzen, niessen vnd nemen, auch vns alweg des negsten suntag nach sand Merten tag am driten jar dauon raichen vnd geben funfvndvierzig phening, auch sonnst in aller voderung dauon gehorsam vnd gewerttig sein, als rechtlehens, lanndes zu Österreich ob der Enns recht ist, ongeuerde. Zu vrkund mit meinem aigen anhanngunden jnnsigl besigelt, doch an der lehenschaft rechten vnd voderungen vnuergriffen vnd onschaden. Geben am sambstag nach Peter vnd Paulj, nach Cristj geburde im funfzehen hundert vnd sechsundfunfzigisten jare."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 617 (S 443), S. 686-687