"Ich Erasm herr von Starhemberg(1) etc. Bekhenne, das fuer mich khumben ist Hanns Gartner(2), burger zu Rarbach mit anntzaigung wie Hanns von Sexing(3) alls zechmaister vnnd lehenntrager des gotzhauss sanndt Jacob zu Rarbach halben zehenndt auf dem hoff zu Kärnndten(4) in Rorbeckher pfarr vnnd Veldner lanndtgericht gelegen, von mier zu rechtlehen gehabt vnnd vermüg aines lehenbrieffs empfanngen hett, verschiner zeit mit todt abganngen vnnd er zu ernenntes gotzhauss zechmaister vnnd lehenntrager füergenumben ware. Batt mich darauf vnnderthenigs vleiss, jme alls jetzigem zechmaister vnnd lehenntrager berüertes sanndt Jacobs gotzhauss zu Rorbach dennselben zehenndt zuuerleihen geruechen. Welches sein vleissig bitten jch angesechen vnnd jme alls zechmaister vnnd lehentrager bestimbts gotzhauss obberüerten zehenndt mein vnnd meines froundtleichen lieben vettern, herrn Paull Jacoben(5), herrn von Starhemberg ~ lehennschafft verlihen. Verleich jme den auch hiemit wissentlich in crafft ditz brieffs, was jch jme zu recht daran verleihen soll, khann vnnd mag. Allso das er vnnd all nachkhumbendt zechmaister vnnd lehenntrager angeregten zehenndt nun füerpas von mier, ernenntem meinem vettern, vnnd vnnsern erben, in rechtlehennsweiß jnnenhaben, nützen, niessen vnnd jeder gepüerlichen zeit, wann sich das lehenn durch denn lehennherrn oder lehenntrager verwanndlt vnnd gefellt, zu lehen nemben, auch in aller vorderung dauon gehorsamb vnnd gewärttig sein sollen, wie dann rechtlehenns vnnd lanndes Österreich ob der Enns recht ist, ongeuerde. Des zu vrkhundt, mit meinem aignen hier angehanngnem jnnsigl besiglt, doch mier, berüertem meinem vettern vnnd vnnsern erben an vnnser lehennschafft rechten vnnd aller vorderung vnuergriffen vnnd dem jnnsigl on schaden. Geben auf Wildtperg, am tag Johannis Baptiste, nach Chrissti vnnsers lieben herrn vnnd haillandts gepuerde jm fünfftzehenn hunndert vnnd sechßundfünfftzigisten jare."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 616 (S 442), S. 685-686