"Ich Annder(1), aus gottlicher schikhung probst des wurdigen gotshaus vnnser lieben frauen Schlag, zum Schlegl: Bekhen das fuer mich khumen sein jetzt gedachts meines gotshaus vnnterthanen, die ganntz dorfmenig amb Liechtennperg(2), mit disem anzaigen, wie daß sie eines gehültz zu yrer hauß notturfft bedurfftig waren; mich derhalben sonnders fleis gebeten, jenen ain ortt an dem Sperpuchl(3) genadikhlich zuuerkhauffen geruchen woltte. So jch dan yreß furgebens guet wissen drag, vnnd das sie nicht sonnders gehultz zu yren notturfften zu gebrauchen haben, hab ich ienen zu aufnemung yreß khunftigen nutz vnnd frumens auff jre pitte ersprießlich vnnd furderlich sein wollen, also ganntzer dorfmenig ain grundt amb Sper Püchell gelegen, ausser aller wisen doselben (welicher grundt mit dem ainen ortt ann yr, der Liechtenn Perger waydt annstossunt, vnnd nach der Plann Strassen(4) hinein vnntzt an deß Jeorgen Straussen(5) wiß, vonn dannen nach dem weg zwerich hinumb ann deß Wolfganngen Schartners(6) zu Vlrichs Perg wiß, vnnd Sperpüchl Weg, auch nach demselben weg wider herab ann jr wayde) hingeben vnnd verkhaufft hab. Gib vnd verkhauf jnne dennen hiemit khrafft brieffs dergestalt, daß sie gemelten grundt vnnd gehültz nun hinfuro mugenn inhabenn, nutzen vnnd niessen, wie innen amb pestenn fuegt. Dafuer haben sy mir ain suma geltts auf mein benuegen bezalt, es sollenn auch aller inhaber jer wisenn, so in berhuertem grundt gelegen sein, anrennden, wie zuuor die Hagressing(7) zur notturfft zu gebrauchenn habenn. Zu dem sollen sie vnnd al jre nachkhumen mir vnnd meines gotshaus nachkhumen jarlich zu sannt Johans dag zu sunnibenten dauon dienenn vier schilling phening vngeuerlich. Des zu warer vrkhundt gib jch egemelter Anndreas, probst, anngezaigter dorfgemain, allenn yren nachkhumen gegennbertigen brieff, mit mein, des gotshaus grossen annhangenndem jnsygll geuertigit. Der geben ist nach vnnsers lieben herren vnnd hayllannts geburt funfzehen hundert vnnd in dem drey vnnd sechzigistem jar, denn letztenn tag des monats junj."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 625 (S 451), S. 693-694