"Bernhardus Schwartz(1), Dei gratia decanus ecclesiæ Patauiensis, vtriusque juris doctor: Vniuersis et singulis ecclesiarum parochialium rectoribus seu locum tenentibus eorundem, cæterisque presbyteris curatis et non curatis, quibuscunque per iurisdictionem nostram ubilibet constitutis, salutem in Domino. Expositum est nobis pro parte dilectæ jn Christo Margarethæ, vxoris legitimæ Sigismundj de Neindling(2), plebis Haslach, quomodo idem Sigismundus, eius maritus legitimus, ante vndecim fere annos, propria temeritate, ab eadem eius uxore, clam et citra eius uoluntatem discesserit, et ad alienas partes se dederit. Et licet eadem Margaretha adhibuerit de inquirendo eius marito diligentiam, eundem tamen hactenus reperire non potuisset. Jmmo nesciat eum viuum, sed credat, eundem dudum esse defunctum. Jnterea cum quodam Johanne(3), filio Pongratij Stephl(4), plebis Pfarkhirchen im Eylandt notitiam contraxisset, ac partes huiusmodi respectiue hinc inde altera, alterj stipulando et promittendo matrimonium putatiuum(5) inter se contraxerint. Nobis humillime supplicando, quatenus jpsam et eundem Johannem in matrimonio putatiuo huiusmodj tollerare dignaremur. Nos jgitur supplicationj huiusmodi inclinatj, accedentesque melius esse matrimonium putatiuum et tolleratum, quam publice contubernium. Jdcirco eosdem Margaretham et Johannem in contractu huiusmodi putatiuo per eos, ut premittitur, inito et consumato, et medijs eorum ad imaginem crucifixi prestitis juramentis coram nobis confessatis: auctoritate nostra ordinaria in Dei nomine tollerandam duximus et tolleramus per presentes. Jta tamen, quod [...](6) quoad uitam prioris mariti durante, non copulentur, neque ad solemnisationem nuptiarum in facie ecclesiæ admittantur, nisi aliud desuper a nobis receperitis in mandatis. Jpsaque Margaretha debite coniugale a superinducto huiusmodi non exigat, sed reddat ex actis. Et quamprimum eius maritus vivere [?] certificata fuerit, eundem superinductum statum deserat et primo studeat cohabitare. Quocirca vobis omnibus et singulis dominis supradictis, quibus presentibus requisiti fueritis, aut alter uestrum requisitus fuerit, conmittimus et in virtute sancte obedientiæ mandamus, quatenus eosdem Margaretham et Johannem in huiusmodi eorum putatiuo et tollerato matrimonio non impediatis. Jmo ad venerabilis Eucharistiæ sacramentj conmunionem toties quoties uidebitur admittatis. Nisi aliter de prænarratis uobis constiterit. De quo nos certiorem uelitis [...], conscientiam uestram in eo onerantes. Datum et actum [Patauie in] curia canonicalj nostræ solite residentiæ die martis, septima mensis martij, anno Dominj millesimo quingentesimo sexagesimo quarto, nostro sub secreto tergotenus impresso."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 627 (S 452.a), S. 696