"Erwürdiger, geystlicher herr, euch sein mein diennst in guetem willenn zuuor. Jch hab euren bericht, so jr mir auf N: der meister vnnd gesellnn aines hanntwerchs der leinweber jm gericht Vlrichsperg(1) suppliciern, vnnd darüber von mir an euch ernwerben [!] beuelch, vmb das jr zuwider jrer allten hanntwerchsordnunng etlichen jren hanntwerchsgnossen jm marckht Aigen(2), bej euch zum Schlegl, ain neue aufzurichten zuelassen woltet, vbergebenn, vernomen, vnd was sy mir auch fur ainen gegenbericht eingebracht vnnd mich hierüber vmb gerichtliche hilf vnderthenigclich anrueffen vnnd biten thuen, das werdet jr euch hier in verwarter nach lenngs zuberichten haben. So den euch nit gebüert, fur euch selbs vnd one vorwissen der Röm. khay. Mt(3). als lanndspürlichen obrigkhait in derselben jurisdiction ainicherlay hanndtwerchsordnunng mit den leinwebern, als in berüertem Aigen oder annderer ortt aufzurichten vnnd darüber zu ferttigen. Demnach ist in namen höchsernenntter khay. Mt. mein beuelch an euch, das jr angezogne hanntwerchsordnunng alspalt ein vnnd abstellet, vnnd da die supplicannten ain hanntwerchsordnunng anzurichten vorhabenns sy an die Röm. Khay. Mt. vmb aller genedigisten consenz vnnd bewilligung fur vnnd anzubringen weisenn thuet, an dem voltzeucht jr höchsternennter Khay. Mt. willen vnd mainung. Datum Linnz, den aindlifsten tag julij, anno etc. jm neun vnd sechzigisten." ||
||
[Unterschrift:] "Georg vonn Mäming(4) zw Khirchperg an der Puelach, riter, Röm. Khay. Mt. rath vnnd lanndtshaubtman in Österreich ob der Enns."||
||
[Anschrift:] "Dem erwürdigenn vnnd geistlichen herrn, herrn Michaelnn(5), brobst zum Schlegl."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 637, S. 704-705