"Ich Paulus(1) der heyligen schrifft doctor, vnnd durch göttliche fuersehung brobst zum Schlögl: Bekhenn hiemit offentlich vnnd gegen menigckh, das der bschaidn Oswalt Löb(2), behaust am Claffer, für mich khomen jst, vntterthänigs vleiß gepetten, das jch ihme vnnd Barbara, seiner ehelichen hausfrauen, zway thaill zehent auf fünfthalb güettern am Claffer vnnd Freyndorff(3), Vlrichspergerischer pharr, vnnd baide dörffer mir, dem gottshaus zuegehörig, daruon er mir, dem gottshaus, allwegen am dritten jar sechs schilling phening zu geben schuldig ist, lehenschafft genedigckhlich geruehen wolte zuuerleyhen. Solliches jch auf sein zimblichs gepett gethann vnnd verliehen hab. Verleich ihme, seiner hausfrau vnnd erben gedachten zehent mit seiner rechtlichen zuegehörung hiemit habender macht wissentlich vnnd in crafft dicz brieffs, was jch ihme von rechts wegen daran zuuerleyhen hab. Also das er, Leb, Barbara sein eheliche hausfrau vnnd ihre erben obbemelten zehennt mit aller zuegehörungen nun hinfüron lehensweys mögen jnhaben, nüczen, geniessen vnnd nach ihren oder seinen gefallen prauchen, als rechten lehens im lannd Österreich ob der Enns vnnd der herrschafft Schlögl sitt vnnd recht ist. Es soll auch gedachter lehentrager, so offt sich bey der herrschafft Schlögl veränderung zuetregt, oder auch der lehentrager durch ableybung oder verwandlung, wie die beschäch, abgieng vnnd zuetragen wurde, widerumben das lehen mit brieff vnnd sigill von neuem zu nemen vnnd zu entphahen schuldig sein. ~ Des zu warem vrkhunndt mit mein, des gottshaus grossen anhangenden jnsygill bestätt vnnd bekhrefftigt, doch mir, meinen nachkhomen, an lehenschafft, obrigkhaitt, herren vorderung vnnd gerechtigkhaitt in allwege vnuergriffenn, on schaden vnnd nachthaill. Geschechenn vnnd geben am tag Johannis des heyligen tauffers zum sohnenwentten, nach Christj vnnsers lieben herren vnnd säligmachers gepurtt fünfzehen hunndertt vnnd in dem sechs vnnd sybenczigistem jare."||
||
Unter der Plica: "Für das khon [?] oder briefs fertigung jst zu gebn ain gulden schuldig, vnnd nit mer. Dan schreyberey gelt zwen schilling phening."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 645 (S 462), S. 710