"Ich Hanns Wiglitz(1) sailler mitburger zue Lynncz, vnnd jch Magdalenna sein eheliche hausfrau: Bekhennenn [...] das vnns weillennd des erbarn, beschaidnenn Merthenn Seillers(2), saillers vnnd gewesennenn mitburgers zue yeczt ermelltem Lynncz, selligenn, ehelich nachgelassenne wittib mit namenn Maria, die leczte halbe werunng vnnd allso ganncz völlige khaufsuma vmb vnnser behausunng daselbs zu Lynncz in der mitternn vorstatt, zwischen Hannsen Gruennauers(3) burgers allda, vnnd weillennd Paullenn Lechennpauren(4) schifmans selligenn nachgelassenner erbenn, der baider hausernn gelegen, welliche wir jnnen denenn beidenn gewesten conleuthenn vnnd jrenn baidenn erbenn vermüg vnd jnnhallt aines ordennlich hierüber ausgerichtenn khauffbriefs, dets datum zu obbemelttem Lynncz, freytags denn achtvnndczwainzigistenn monnatstag nouembris des verschinenn zwaivnndsibennczigistenn jars(5) steet, aufrecht vnnd redlich verkhaufft vnnd kheufflich zue khauffenn gebenn, benenntlichenn zwaihundert vnnd achtczigs guldenn an hant dits briefs dato erbarlich enntricht, vergnuegt, beczalltt vnnd zuegestellt hat, die wir auch allso in barem gellt guetter lanndes Österreich ob der Enns werunng, one allenn abganng vnnd manngl, vonn vnnd auß jrenn zue vnnsernn selbs aignenn sichernn hanndenn vnnd gwarsam emphanngenn vnnd eingenomenn habenn, sagenn demnach vnnd hierauf für vnns vnnd alle vnnsere baide erbenn, bei vnnsernn warenn treuenn hie ob anbemelltte Maria Seillerin, alle jre, auch mergedachts jres gewestenn hauswirdths selligenn erbenn, oder wer sonnst derwegenn verrers quittirenns notturfftig sein oder werdenn möchte, angeczaigter vnns vberannttwortt, beczallt vnnd zuegestelltter ganncz volligenn khaufsuma der zwayhundert vnnd achtczigs guldenn halbenn, hiemit allerdings ganncz quitt, frey, los, ledig vnnd muessig [...........]. Zue warem vrkhund dits briefs, mit der fursichtigenn, ersamenn vnnd weisen herrnn Georgenn Huetters(6) an der zeit burgermaisters, vnnd Niclasenn Khuepergers(7) stattrichters zu Lynncz, alls vonn ordennlich fürgeseczter stattobrigkhait daselbs wegenn baider aignenn hiefür gedrugkhtenn pedtschafftenn (doch jnen, jren erben vnd pedtschafften in allweg one schadenn) verferttiget, die wir im annfanng bemellte baide connleuth mit gehorsamem, diemuettigem hochem vleiß darumb erbeten haben. Geschehen daselbs zu Lynncz, am erichtag nach Paully bekherung, den sechsvnndczainczigisten monatstag january, nach Christy vnsers lieben herrn gebuerde, im funffczechenn hundert viervnndsibennczigisten jar."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 644 (S 461), S. 709-710