"Wir Rudolff der ander(1), von Gottes genaden erwelter Römischer kaiser, zu allen zeitten merer des reichs, jnn Germanien, zu Hungern, Behaimb, Dalmatien, Croatien vnd Sclauonien etc. künig, ertzhertzog zu Österreich, hertzog zu Burgundi, zu Brabant, zu Steyr, zu Kärndten, zu Crain, zu Lutzemburg, zu Wirtemberg, ober vnd nider Schlesien, fürst zu Schwaben, marggraue des hailigen Römischen reichs, zu Burgaw, zu Märhern, ober vnd nider Laussnitz, gefürster graue zu Habspurg, zu Tyrol, zu Pfierdt, zu Khyburg vnd zu Görtz etc. landtgraue in Elsäss, herr auf der Wyndischen marck, zu Portenaw vnd zu Sälins etc. Bekhennen, das vns die ersamen gaistlichen, vnnsere liebe andechtigen N. der probst vnd conuent des gottshauss zum Schlegl(2), in vnnserm ertzhertzogthumb Österreich ob der Ennss gelegen, ainen brieff von weylendt dem allerdurchleuchtigisten fürsten herrn Maximilian(3) dem andern Römischen kaiser, vnnserm geliebten herrn vnnd vattern hochlöblicher vnd seliger gedechtnus aussgangen, darinn jr maiestat jnen vnd jrem gottshauss all vnd yedlich gnad, gab, freyhaiten vnd rechten, so jnen von weylendt kaiser Friderichen(4) hochlöblicher gedechtnus vnd andern vnsern vorfordern fürsten von Österreich gegeben vnd in demselben jrer maiestat brieff jnseriert vnd bemelt sein, confirmiert vnd bestätt furgebracht, dess datum steet in vnser statt Wienn, den letsten tag des monats aprilis, nach Christi vnsers lieben herrn geburt funfftzehen hundert vnnd im funffvndsechtzigisten. Vnd vns darauf diemüettigclich angerueffen vnd gebetten, das wir als regierender herr vnd landtsfürst in Österreich ob vnd vnder der Enns, jnen denselben brieff mit seinem jnhalt auch zu confirmiern vnd zu bestetten genedigclich geruechten. Dess haben wir angesehen solch jr diemüettig bitt vnd jnen dieselb jr gnad, freyhait, gab vnd recht, in allen vnd yedlichen puncten vnd articuln, wie der vorangetzaigt vnsers lieben herrn vnd vattern, kaiser Maximilian des andern bestättbrieff vermag vnd begreifft, vnd souil sie derselben in geprauch sein, dartzue an jren freyhaiten, darumb sie in ansprach oder rechtfertigung steen möchten, vnuergriffen, von newem aus gnaden confirmiert vnd bestätt. Vernewen, confirmiern vnd bestetten jnen auch die wissentlich mit disem brieff, was wir von recht vnd billichait wegen daran vernewen vnd bestetten sollen. Also, das der obgemelt vnnsers lieben herrn vnd vattern, kaiser Maximilian des andern bestättbrieff in allen seinen puncten vnd articuln darinn begriffen vnd bemelt, gentzlich bey crefften bleiben, vnd sie vnd jre nachkomen des geniessen vnd geprauchen sollen vnd mögen, von menigclich vnuerhindert. Gepieten [...........](5) mainung. Mit vrkhundt dits brieffs, besiglt mit vnserm kaiserlichen anhangendem jnsigl. Geben auf vnnserm künigclichen schloss zu Prag, den funfftzehenden tag des monats nouembris, nach Christi vnnsers lieben herrn vnd saligmachers geburt funfftzehen hundert vnd im achtzigisten, vnserer reiche des Romischen im sechsten, des Hungerischen im neunten vnd des Behaimbischen auch im sechsten jaren."||
||
Eigenhändige Unterschrift links unter der Plica: "Rudolff."||
||
Unter der Plica: "Confirmatio priuilegiorum fur probst vnd conuent des gottshaus zum Schlegl" E. G. Andr: Gaill. D." Darunter ".V. S Vieheüser b." (?)||
||
Rechts unten auf der Plica: "Ad mandatum sacrae Caes. maiestatis proprium"||
||
Darunter: "A. Erstenberger." (?)

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 652 (S 468), S. 715-716