"Ich Hanns Christoph von Öedt(1) zu Getzendorf: Bekhen für mich vnnd all mein erben, das für mich khomben ist der erbar vnnd fürnemb Steffan Lüffter(2), burger vnnd des raths als lehentrager an stat der ganzen burgerschafft der bruederschafft zu Haslach(3), vnnd batte mich gehorsamblichen, jme die zway thail zehent auf den zwayen guettern zu Rünixenperg(4), in Rorbeckher pfar vnnd Veldtner landtgericht gelegen, so von mir zu lehen rüeren, hanstigkhlich zuuerleihen geruechten. Welches sein bitten jch angesehen. Verleich jme die selben, souil jch jme von rechts wegen daran verleihen soll, khan vnnd mag. Also das er vnnd seine nachkhomen anstat der bruederschafft angeregte zehent mag nüzen vnd prauchen, vnnd solle mir albeg am dritten jar dauon dienen vnd raichen drey schilling pfening, vnnd sich auch in all andern sachen alzeit gehorsamblichen verhalten, wie es ainem getreuen lehensman gegen vnser herrschafft zuthun geziemt. [...](5) Des zu warem vrkhundt hab jch mein aigen porn jnsigl hieran hangen lassen, doch mir, meinen erben an der lehenschafft, auch aller herrn vorderung recht vnnd gerechtigkhaitten vnuergriffen, vnnd dem jnsigl ohne schaden. Geschehen zu Gezendorf, den neundten october(6) jm fünfzehen hundert achtunndachtzegisten jarr."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 668 (S 479), S. 732-733