"Admodum reuerende in Christo nobili ac strenuo domino Christophoro Prettingero(1) de Persing, ecclesiæ cathedralis Patauiensis præposito, consiliario et oeconomo nec non præposito in Mattsee, et in spiritualibus super Onasum officiali et vicario generali, ac etiam jmperatoris augustissimi et inuictissimi a consilijs: Nos, F. Wenceslaus(2) præpositus, F. Joannes(3) prior, totusque conuentus coenobij Plagensis, ordinis Præmonstratensis, dioecesis Patauiensis, post humiles ac deuotas nostras ad Deum preces, omnem reuerentiam humili cum obsequio. Vacante ad praesens, reuerende admodum in Christo domine vicarie, parochiali ecclesia sancti Jacobi in Rhorbach(4) præfati dioecesis cum ad nos ac monasterium nostrum ratione præposituræ præsentatio siue ius præsentandi personam idoneam de iure patronatus et consuetudine immediate spectat ac pertineat: Idcirco ne præfata ecclesia in Rhorbach pastore et rectore ulterius careat, atque sic in rebus tum spiritualibus tum temporalibus, eidem nonnihil detrimenti accidat, super hoc maturo consilio prouidere uolentes venerabilem dominum Dauid Gebhard(5) pastorem quondam in Rörenpach(6), ad prætactam ecclesiam in Rhorbach habendum, regendum, possidendum habilem et idoneum præsentandum duximus, quam et per præsentes sic præsentamur, qua decet obseruantia, enixe hisce flagitantes, quatenus reuerenda vestra deuotio præsentationem huiusmodi admittere ac dictum dominum Dauid præsentatum ad supradictam ecclesiam parochialem in Rhorbach instituere et de eadem inuestire, eidemque curam animarum pariter et administrationem rerum diuinarum negotiorumque omnium, quæ ad functionem pastoralem pertinent, committere et gratiose conferre dignetur: In gratiam nobis pie ac humilime promerendam. Jn cuius rei fidem et euidens testimonium has præsentationis litteras sigillis nostris hic appensis conmuniri fecimus. Actum etc. 23. may 1599."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 682, S. 746-747