"Wir Leopold(1), von Gottes genaden ertzherzog zu Össterreich, bischoue zu Passau, hertzog zu Burgundi, Steyr, Khärnten, Crain vnnd Wierttemberg etc, graue zu Tyrol vnnd Görcz etc: Bekhennen das wier vnnserm getreuen Hannsen Getzinger(2), burger zu Haslach, anstat vnnd zu hannden St: Niclaß gotshaus daselbst zu Haslach, als desselben lehentragern, das guet in der Voraw(3) in Peuerbeckher pfarr vnnd lanndtgericht, jtem vnnd das guett zue Hartmansdorff(4) in sant Peters pfarr vnnd Haslinger lanndtgericht gelegen, so vonn vnns vnd vnserm stifft Passaw zu lehen ruren vnnd geen, zu rechtem lehen verlichen haben. Verleichen jme die auch mit allen jren zuegehörungen hiemit wissenntlich vnnd in crafft dicz brief, was vnd so.il wir jme dann billich von lehen vnnd rechtenns wegen daran verleichen sollen vnnd mügen. Darauf [...].(5) Zu vrkhundt dits briefs vnnder vnnserm anhangendem secret verferttigt. Geben in vnnser statt Passaw, den neundten monatstag septembris, nach Christi vnsers lieben herrn vnd seligmachers geburde jm sechzehen hundertistem jare."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 685 (S 490), S. 747-748