"Ich Hannß Ardolf Tättenpekh(1) zu Hauspach, Khirchperg vnd Vtzenaich auf Einburg: Bekhenn hiemit disem brief, das nach absterben weilendt Georgen Schwarzpekhen(2), burger zu Haslach seligen, gewester lehentrager vber den ganzen grossen vnd khlainen zehent auf dem gutl zu Vordorf(3), Peilstainer pfarr, Veldner landtgrichts, der ersamb Hannß Springinkhleiben(4), burger vnd diser zeit spitalluerweser zu Haslach(5), vnd ainem, wie er lehentrager vber berurten zehent zu Vordorf, welcher mir mit aller obrigkhait vnderworffen, auch rechtlehen dienstbar ist, geruchte zuuerleihen. Bath demnach gehorsamblich, jme solchen zehent vnd lehenschafft gunstigclichen zuuerleihen. Welches sein gehorsambs bitten angesehen, vnd angedeiten zehent verlihen; verleich jme den auch hiemit wissentlich crafft dits briefs, was jch jme doch von rechts wegen daran verleihen soll, khan oder mag. Also das er, Springinkhleiben, als lehentrager in namben angeregtes bruederhauss zu Haslach vnd dessen armen leithen zu guetem. Vilbesagten zehent auf ernentem gutl zu Vordorf mit seiner von alterhero rechtlichen zuegeherung nun furohin von mir vnd meinen erben rechtlehens weis jnhaben, nuzniessen, gebrauchen, jeder geburlicher zeit zu lehen nemben, vnd als offt sich solcher zehent verwandlt, mit tott oder in ander weg, mir oder meinen erben zwai pfundt pfening vnd nit mer raichen vnd dauon geben, auch sonssten in allen forderungen threu, gehorsamb vnd gewertig sein solle, als dan recht lehens vnd landes Osterreich ob der Enns gebrauch ist, ohngeuerthe. Zu vhrkhundt verferdtigt mit meinem aigen angebornen hiranhangendtem jnsigl (doch mir, mein erben, an vnser lehenschafft rechten vnd fordrungen vnuergriffen, vnd dem sigl ohne schaden). Geben vnd beschehen den zehenten monatstag decembris, nach Chrisstj geburt jm sechzehen hunderten jare."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 686 (S 491), S. 748-749